Standa með Ey­gló í mar­tröðinni

Eygló Fanndal Sturludóttir er líka þakklát fyrir þetta bakland sitt í nýrri færslu á samfélagmiðlum.

„Kærar þakkir til bestu styrktaraðila í heimi. Þau hafa stutt mig í gegnum súrt og sætt og halda áfram að trúa á mig og hjálpa mér að láta draum minn rætast. Ég gæti ekki gert þetta án þeirra og ég er þeim ævinlega þakklát,“ skrifaði Eygló og birti lista yfir styrktaraðila sína sem má sjá hér fyrir neðan.

Eygló hefur líka sýnt frá endurhæfingu sinni á samfélagsmiðlum og þar var hægt að fylgjast með því þegar hún mátti ekki hafa eitt lóð á stönginni í það að geta farið að bæta við lóðum og þyngja stöngina smám saman. 

Þetta ferli hefur tekið marga mánuði og án efa reynt gríðarlega andlega á íþróttakonu sem er vön því að taka vel á æfingum sínum. Nú þarf skynsemdin að vera ofar öllu svo hún detti ekki aftur í sama skelfilega far.

Eygló missti af heimsmeistaramótinu síðasta haust vegna brjóskloss í baki en þegar hún var að komast aftur á fullt meiddist hún svo aftur í vetur. Hún endaði þá á sjúkrahúsi þar sem leið yfir hana.

Eygló hafði rifið brjóskþófa í mjóbaki á æfingu og fór með hraði upp á spítala þar sem hún missti meðvitund þegar hún reyndi að ganga sjálf.

„Ég gat hvorki staðið upp né gengið og ég titraði og skalf,“ skrifaði Eygló á sínum tíma í færslu sinni á Instagram.

Hún hefur síðan þurft að vera mjög þolinmóð á meðan hún byggir upp bakið á nýjan leik.

„Markmiðið hefur verið að gefa brjóskþófanum þann tíma og hvíld sem hann þarf til að gróa áður en álagi er bætt við aftur smám saman. Þetta hefur verið ótrúlega erfitt og hefur reynt á þolinmæði mína og seiglu á þann hátt sem ég hefði aldrei getað ímyndað mér,“ skrifaði Eygló í vor.

Vonandi nær Eygló að keppa á ný á meðan hún ríkir sem Íþróttamaður ársins því annars verður hún sá fyrsti í sögunni sem keppir ekki á árinu eftir kjörið.

Þessi færsla Eyglóar sýnir þó fyrst og fremst að styrktaraðilarnir standa með Eyglóu í meiðslamartröðinni, sem eykur líkurnar á því að við sjáum hana aftur keppa við þær bestu í ólympískum lyftingum.