Björg­vin Karl og liðsfélagar hans í þriðja sætinu eftir fyrsta dag

Björgvin Karl og liðsfélagar hans í CrossFit Oslo Kriger eru í þriðja sætinu eftir tvær greinar, tuttugu stigum á eftir toppliði Camp Rhino CrossFit frá Bandaríkjunum og fimmtán stigum á eftir CrossFit Mayhem sem er líka frá Bandaríkjunum.

Með Björgvini í liði eru fyrirliðinn Kristin Holte, Oda Lundekvam og Tola Morakinyo en sá síðastnefndi keppti einu sinni með Anníe Mist Þórisdóttur í liði á heimsleikunum.

Oslóliðið byrjaði ekki nógu vel með því að ná bara tíunda sætinu í fyrstu grein þar sem það ýtti saman sleða en bætti stöðu sína verulega með því að ná öðru sæti í seinni grein dagsins sem var handstöðuboðhlaup.

Lið CrossFit Reykjavíkur er í sjötta til sjöunda sæti eftir þennan fyrsta dag. Liðið er með 135 stig sem er 25 stigum minna en lið Björgvins Karls. Í liði CrossFit Reykjavíkur eru þau Bjarni Leifs Kjartansson, Rökkvi Hrafn Guðnason, Elín Birna Hallgrímsdóttir og Guðbjörg Valdimarsdóttir.

Íslensku krakkarnir voru í áttunda sæti í fyrstu grein og svo í níunda sæti í annarri grein en tuttugu lið taka þátt í heimsleikunum að þessu sinni.

Keppni heldur áfram í dag og þá fara fram þrjár greinar. Keppni einstaklinga heldur líka áfram í dag eftir eins dags frí.