Ekki syrgja sumar­fríið (of snemma!)

Eftir versló fer síðan allt á fullt!

Hið daglega hversdagslíf tekur við, undirbúningur fyrir skóla krakkanna, jafnvel að byrja aftur í ræktinni eða einhverju átaki með haustinu.

Og jú; síðan er það vinnan.

Það skrýtna er að þótt fólk sé mjög ánægt í starfinu sínu getur það líka upplifað ákveðinn kvíða eða depurð síðustu dagana í fríi.

Eins og núna, þegar við vitum að það er stutt eftir.

Skýringin virðist frekar felast í breytingunni sjálfri. Í sumarfríi lifum við oft í allt öðrum takti. Við sofum lengur, höfum meira frelsi yfir deginum, tökum færri ákvarðanir og berum minni ábyrgð. Þegar fríinu lýkur þarf heilinn skyndilega að skipta yfir í skipulag, tímaáætlanir, verkefni og daglegar skyldur.

Harvard Business Review gefur nokkur góð ráð tengd þessu:

Að njóta síðustu daganna sem best og án þess að hugsa um of um það að fríinu sé að ljúka.

Að nýta tækifærið til að gera það sem við svo sannarlega viljum sleppa; allt frá góðum göngutúr yfir í að hitta vini, góðan kvöldverð eða bara eitthvað annað sem veitir þér mikla ánægju.

Tveimur dögum áður en vinna hefst á ný er þó mælt með því að reyna að aðlaga svefninn að því að rútínan sé að fara að hefjast á ný.

Það er líka ágætt að hafa í huga að hjá flestum hverfa þessar tilfinningar fljótt. Rannsóknir benda til þess að flestir séu komnir aftur í sinn eðlilega takt eftir örfáa daga í vinnu. Kaffibollinn með samstarfsfólkinu, verkefnin og daglega rútínan taka smám saman við og áður en varir er sumarfríið orðið að góðri minningu frekar en einhverju sem maður syrgir.