Vakinn klukkan tvö um nótt til að fara í lyfja­próf

Vingegaard datt þegar rúmir tuttugu kílómetrar voru í mark og hélt um öxlina á svæðinu í kringum viðbeinið. Hann gat ekki komist aftur á hjólið og var að lokum fluttur burt í sjúkrabíl. Vingegaard var síðan fluttur í myndatöku sem staðfesti viðbeinsbrot og nokkra skinnáverka. Daninn fer nú í aðgerð á næstu dögum og hefur lokið keppni í Frakklandshjólreiðunum í ár.

Aðfaranótt sunnudags var svefn Danans truflaður þegar hann var vakinn af lyfjaeftirlitsmönnum klukkan tvö. Tadej Pogacar, einn helsti keppinautur hans, sér möguleg tengsl milli truflaðs svefns Vingegaards og fallsins.

„Ég fór að hugsa um að við hefðum farið í lyfjapróf í nótt. Hann [Vingegaard] var vakinn klukkan tvö í nótt. Það fékk mig til að hugsa um hvort nótt þar sem svefninn er eyðilagður gæti kannski leitt til þess að maður sé aðeins minna einbeittur. Og nú er túrinn hans svo eyðilagður,“ sagði Pogacar við TV2.

„Ég er ekki að segja að það sé ástæðan, en það gæti kannski tengst að einhverju leyti. Það er allavega virkilega sorglegt að sjá hann hætta,“ sagði Pogacar

Vingegaard sjálfur vildi ekki útiloka að það væru tengsl, þótt hann væri ekki mikið fyrir að velta því fyrir sér.

„Það er ljóst að það hefur allavega ekki gert neitt gott. Hvort það sé ástæðan þori ég ekki að spá fyrir um. Ég vil ekki kenna því um, því þetta er hjólreiðakeppni og byltur gerast í hjólreiðakeppnum. Svo ég þori ekki að svara því,“ sagði Vingegaard við TV 2 Sport.

Marc Reef, íþróttastjóri Visma, liðs Vingegaard, vill ekki ræða slíkar getgátur.

„Það er ekki eitthvað sem við eigum að velta fyrir okkur. Við vorum klárir í morgun. Jonas var klár, strákarnir voru klárir og liðið var klárt. Honum leið líka vel á dagleiðinni. Byltan sjálf var meira vegna þess að mótorhjól bremsaði fyrir framan hann. Þetta var undarleg staða og þeir þurftu allir að bremsa. Jonas var sá fyrsti sem datt,“ sagði Reef við TV 2 Sport og aðra fjölmiðla.

Tadej Pogacar er í forystu Frakklandshjólreiðanna eftir fimmtán sérleiðir en hann segir að það sé „virkilega sorglegt“ að Jonas Vingegaard hafi hætt keppni.

„Síðan 2021 höfum við alltaf barist um sigurinn. Við höfðum kannski ekki besta sambandið í byrjun þegar við kepptum hvor á móti öðrum en síðustu ár höfum við verið samstarfsfélagar sem berum virðingu hvor fyrir öðrum og erum líka eins konar vinir. Túrinn verður ekki samur án hans,“ sagði Pogačar í viðtali við mótshaldara eftir dagleið sunnudagsins.