Elvar snýr aftur til Litháens

Elvar var í dag kynntur sem nýjasti leikmaður Klaipeda Neptunas sem er eitt besta lið Litháens. Liðið hafnaði í 3. sæti litháensku deildarinnar á síðustu leiktíð og féll út í undanúrslitum úrslitakeppninnar.

Elvar kemur til félagsins eftir að hafa spilað með Anwil Wloclawek í Póllandi í vetur og svo óvænt í lok leiktíðar með La Laguna Tenerife í spænsku úrvalsdeildinni.

Elvar lék einnig í Litháen fyrir fjórum árum þegar hann var leikmaður Rytas Vilnius en þá var hann í lykilhlutverki og skoraði að meðaltali 13,5 stig í leik og átti 6,3 stoðsendingar.

Elvar er algjör lykilmaður í íslenska landsliðinu sem komið er á lokastig undankeppni HM og hann mætti einmitt Litháen í tveimur leikjum, og skoraði sigurkörfu og 34 stig þegar Ísland vann frábæran heimasigur gegn Litháen í febrúar.

Neptunas verður þriðja litháenska liðið sem Elvar spilar fyrir því hann lék með Siauliai tímabilið 2020-21.

Samningur Elvars við Neptunas er til eins árs. Hann er annar íslenski landsliðsmaðurinn sem kynntur er hjá nýju félagi í dag, daginn eftir sigurinn góða á Bretum, því Jón Axel Guðmundsson er genginn í raðir Gran Canaria á Spáni.