„Maður hefur spilað körfu­bolta lengi“

„Mér fannst við bæta varnarleikinn svolítið mikið í seinni hálfleik og það var svona það sem skóp þennan sigur fyrir okkur,“ sagði Jón Axel, sem var með 25 stig og átta fráköst, í samtali við RÚV eftir leikinn.

Eftir slakan fyrri hálfleik bætti íslenska liðið sig í síðari hálfleik og tókst að lokum að knýja fram dramatískan og mikilvægan sigur.

Hvað rædduð þið í hálfleik?

„Við ræddum að við værum búnir að spila hræðilega vörn á móti Ítalíu og værum búnir með þrjá hálfleiki með slakri vörn. Við ætluðum að koma árásargjarnir og brjálaðir.

Við vissum að þetta væri úrslitaleikur þannig að við komum brjálaðir inn í seinni hálfleik. Við hefðum þurft að gera það frá byrjun leiks,“ sagði hann.

Unnum Tyrkland síðast

Jón Axel fékk dæmdar á sig tvær mikilvægar villur undir blálokin þegar Ísland var þremur stigum yfir.

„Já, Balli [Baldur Þór Ragnarsson aðstoðarþjálfari] kallaði þetta. Maður hefur spilað körfubolta lengi þannig að maður er aðeins farinn að þekkja hvenær á að gera þetta,“ útskýrði hann.

Ísland mætir Tyrklandi, Serbíu og Bosníu og Hersegóvínu í seinni umferð undankeppni HM.

„Mér líst bara helvíti vel á það. Síðast þegar við spiluðum á móti Tyrklandi heima þá unnum við. Við erum vanir að spila á móti stórum þjóðum. Við viljum spila á móti þessum þjóðum og sýna þeim að við getum líka unnið þær,“ sagði Jón Axel Guðmundsson að lokum við RÚV.