Ragn­hildur og Aron Snær unnu Korpu­bikarinn

Um annað mótið á GSÍ mótaröðinni var að ræða en þessa helgina var spilað á Korpúlfsstaðavelli Golfklúbbs Reykjavíkur við frábærar aðstæður. 

Aron Snær kom inn í mót helgarinnar eftir að hafa sigrað fyrsta mótið í mótaröðinni í karlaflokki en hann þurfti að hafa fyrir sigrinum í Korpubikarnum þar sem baráttan milli hans og Arons Emils Gunnarssonar úr Golfklúbbi Selfoss var hörð á lokahringnum

Svo fór að Aron Snær hafði betur og lék á alls tíu höggum undir pari á mótinu. Hans annar sigur í röð í tveimur mótum til þessa á GSÍ mótaröðinni. Fullkomin byrjun hjá kappanum. Aron Emil skilaði sér í hús á mótinu á átta höggum undir pari. 

Í kvennaflokki var það Ragnhildur Kristinsdóttir sem stóð uppi sem sigurvegari eftir frábæran lokahring sem hún fór á 66 höggum. Ragnhildur endaði mótið á sex höggum undir pari, fimm höggum á undan næsta kylfingi sem var Perla Sól Sigurbrandsdóttir sem hafði unnið fyrsta mót mótaraðarinnar þetta árið.