Að­eins átta leik­menn eftir hjá einu sögu­frægasta fé­lagi Þýska­lands

1860 Munchen er eins og nafnið gefur til kynna 166 ára gamalt félag staðsett í nágrenni við risaveldið Bayern Munchen.

Ólíkt Bayern var 1860 Munchen eitt af stofnfélögum þýsku úrvalsdeildarinnar, Bundesliga.

Bayern hefur hins vegar unnið 27 sinnum oftar orðið þýskur meistari. Eini titill 1860 Munchen vannst fyrir sléttum sextíu árum.

Það voru gullaldarár félagsins en þau eru löngu liðin.

Nokkrum krísum síðar er liðið nú í þriðju deild en við það að falla niður í fjórðu deild, því félagið hefur ekki efni á því að borga þátttökugjaldið í þriðju deild þýska fótboltans.

Eigandi 1860 Munchen, Hasan Ismaik, hefur hefur líka reynt að selja félagið frá sér síðastliðið ár.

Í yfirlýsingu á Instagram í gær sagði hann tímabært, eftir að hafa eytt meira en áttatíu milljónum evra án nokkurs marktæks árangurs, að hætta að spreða.

„Þetta getur ekki haldið svona áfram. Félagið þarf miklu meira en bara meira fjármagn. Það þarf algjöra endurskipulagningu,“ sagði Ismaik.

Nú stendur 1860 Munchen frammi fyrir því að þurfa að greiða 2,7 milljónir evra, fyrir 3. júní, eða falla niður um deild.

Þegar það kemur í ljós þarf svo að byggja leikmannahópinn upp aftur en aðeins átta leikmenn eru eftir samkvæmt Bild, sem segir alla hina í hópnum hafa farið vegna ógreiddra launa.