Ó­sátt með HSÍ eftir að hafa orðið fyrir for­dómum: „Hreint út sagt ömur­legt“

Hafdís stóð uppi sem Íslands-, deildar- og bikarmeistari á nýafstöðnu tímabili en fordómar sem hún varð fyrir í úrslitaeinvígi efstu deildar gegn ÍBV í Vestmannaeyjum, sökum kynhneigðar sinnar, settu ljótan blett á tímabilið

Fordómarnir birtust í formi söngs þar sem vísað var til kynlífs tveggja kvenmanna en Hafdís er samkynhneigð.

„Þetta dæmi var hreint út sagt ömurlegt,“ segir Hafdís í samtali við íþróttadeild Sýnar. „Það verður að segjast alveg eins og er. Þetta var ótrúlega krefjandi. Ég persónulega þurfti að grafa mjög djúpt bara til þess að halda áfram að sýna styrk, fyrir aðra og að vera fyrirmynd fyrir sama fólk.“

„Maður missti svolítið sjónar á því af hverju maður er í þessu. Að mæta var mikilvægt. Mér fannst það mikilvægara heldur en að mótmæla á annan hátt. Mér fannst mikilvægara að sýna það að vera fyrirmynd. Sýna það í verki frekar en með einhverjum orðum til dæmis. Sem betur fer skilaði það sér og við stöndum uppi sem Íslandsmeistarar.“

Málið vakti mikla athygli, blandaðist inn í pólítík og kosningabaráttu og lauk með því að Handknattleiksdeild ÍBV var gerð sekt upp á 150 þúsund krónur sökum vítaverðrar og ósæmilegrar hegðunar stuðningsmans sem var settur í tímabundið bann.

„Þetta var athygli sem var ótrúlega mikil á tíma þar sem að ég hefði bara átt að vera einbeita mér að klippunum af andstæðingunum.“

Verðstimpill settur á Íslandsmeistaratitilinn

Ertu sátt með það hvernig tekið var á málinu?

„Ég er gríðarlega vonsvikin út í niðurstöðu HSÍ. Mér finnst þetta sýna ekkert fordæmi. Það versta í þessu öllu saman er svo að mér finnst hafa verið settur verðstimpill á Íslandsmeistaratitilinn eða titil yfir höfuð. Þessar upplýsingar segja manni það. Þú getur brotið leikmann nógu mikið, eða nógu marga leikmenn, þannig að þeir spili ekki sinn leik og þá ertu búinn að vinna titilinn. Sem betur fer gerðist það ekki í þessu einvígi og við unnum.“

„Það hefði þurft að koma miklu hærri refsing til þess að sýna fordæmi vegna þess að nú er búið að gefa það út í kosmósið að þetta sé í lagi vegna þess að 150 þúsund krónur er upphæð sem ég get borgað hundrað sinnum. Það er ekki neitt. Það hefði þurft að vera ein góð refsing svo svona komi aldrei aftur fyrir.“

Hafdís er lykilmaður í íslenska landsliðinu og óneitanlega er málið snúið hvað varðar sambandið við HSÍ.

„Þetta voru mikil vonbrigði. Það var tvennt í stöðunni. Ég á enn þá eftir að ræða þetta við HSÍ, fá frekari skýringar, en þetta er hræðilegt. Þessi niðurstaða. Við þurfum aðeins að setjast niður saman HSÍ og ræða málin áður en ég segi eitthvað hér.“