„Veit ekki hvort það er hægt en vonandi reyna þau“

Grindavík er 2-1 yfir og fær aðra tilraun til að tryggja sér Íslandsmeistaratitilinn í kvöld, í Síkinu, eftir að hafa tapað fyrir Badmus og félögum í Grindavík á föstudaginn.

„Það er auðvitað erfitt að lenda 2-0 undir en við elskum áskoranir og þetta er ein af þeim. Við verðum bara að fara jákvæðir inn í leikinn, verðum á heimavelli og getum notað orkuna frá öllum stuðningsmönnunum okkar,“ segir Badmus en hann settist niður og fór yfir málin fyrir leik kvöldsins í viðtali sem sjá má hér að neðan.

Leikur Tindastóls og Grindavíkur hefst klukkan 19:15 í kvöld og vegleg upphitun á Sýn Sport Ísland hefst klukkan 18:30.

Badmus bendir á að allir þrír leikirnir við Grindavík til þessa hafi verið jafnir og spennandi. Ekki hafi mikið breyst fyrir þriðja leikinn þó að þá hafi Tindastóll unnið.

„Við fengum mikla aukaorku frá strákunum af bekknum. Það breyttist ekki mikið, fyrir utan ákefðina í okkur,“ sagði Badmus og bætti við:

„Í fyrstu tveimur leikjunum fannst mér þeir ekki endilega vinna okkur heldur létum við vinna okkur. Við getum ekki verið að vorkenna okkur, við erum í þessari stöðu og eigum að njóta þess. Við notum orkuna frá okkar fólki á heimavelli og hvaðan sem við getum. Við höfum allir unnið titilinn saman og þetta er nánast sama lið. Við verðum að nýta reynsluna sem við höfum og finna leið til að vinna.“

Hann viðurkennir að það sé vissulega farið að taka sinn toll að spila svo marga leiki á skömmum tíma, eins og hjá öðrum leikmönnum.

„Skrokkurinn er eins góður og hann gæti verið. Úrslitakeppnin er ferðalag – erfið fyrir fyrir lappirnar og skrokkinn. Við verðum að hugsa vel um að nærast og sofa vel, og þjálfarateymið gerir mjög vel í að sjá okkur fyrir sjúkraþjálfun, nuddi og því sem við þurfum,“ sagði Badmus.

Badmus biðlar til hinna mögnuðu stuðningsmanna Tindastóls um að hækka rána enn frekar með stuðningi sínum í kvöld:

„Síkið hefur verið brjálað alla úrslitakeppnina svo ég býst ekki við neinu öðru. Þetta verður síðasti leikurinn í Síkinu á tímabilinu svo þetta verður algjör klikkun. Ég hvet þau til að vera sérstaklega brjáluð núna. Ég veit ekki hvort það er hægt en vonandi reyna þau,“ sagði Badmus glaðbeittur og gíraður fyrir veislunni sem fram undan er í kvöld.