Refsað fyrir að mæta mínútu of seint á PGA meistaramótið

Higgo átti að hefja leik klukkan 18 mínútur yfir 7 í morgun að staðartíma, eða klukkan 18 mínútur yfir 11 á íslenskum tíma. Hann var í holli með fyrrum risamótsmeistaranum Shaun Micheel og Michael Brennan sem spilar á PGA mótaröðinni.

Suður-Afríkumaðurinn hafði verið að æfa sig á æfingasvæðinu en skilaði sér ekki á réttan stað í tæka tíð, sumir vilja meina að kylfusveinn hans hefði átt að passa betur upp á þetta.

Higgo var um mínútu of seinn þegar hann mætti á fyrsta teig, klukkan 19 mínútur yfir 7.

Parið sem hann náði á fyrstu holu breyttist því í tvöfaldan skolla en Higgo var búinn að ná höggfjöldanum niður á par eftir níu holur.

Þetta hefði líka getað verið mun verra. Ef Higgo hefði mætt fimm mínútum of seint hefði hann verið dæmdur úr leik.

Higgo er í 85. sæti heimslistans og hefur tvisvar unnið mót á PGA mótaröðinni. Hann er að taka þátt í PGA meistaramótinu í þriðja sinn. Á síðasta ári hafnaði hann í 55. sæti.

PGA meistaramótið er í beinni útsendingu á Sýn Sport Viaplay alla helgina.