„Einn af mínum bestu leikjum á tíma­bilinu“

Leiknum lauk með 97-103 sigri Tindastóls eftir harða baráttu.

„Hver einasti leikmaður liðsins gaf allt í þetta. Við byrjuðum ekki vel, vorum í smá vandræðum en byrjuðum að finna taktinn betur í seinni hálfleik. Við náðum að snúa þessu okkur í vil, gerðum það virkilega vel. Á lokakaflanum fórum við vel með boltann og náðum að vinna,“ sagði Geks í viðtali við Andra Má Eggertsson eftir leik.

Tindastóll byrjaði leikinn illa og var mest þrettán stigum undir í fyrri hálfleik.

„Þetta var erfiður fyrri hálfleikur, Giannis var að setja góð skot en við fundum ekki flæðið í sókninni. Svona er þetta samt bara í íslensku deildinni, þú getur verið tíu stigum undir eða tíu stigum yfir og snúið því við á augabragði. Við þurfum samt klárlega að byrja næsta leik betur, sérstaklega varnarlega.“

Hvað breyttist í seinni hálfleik?

„Við spiluðum miklu betri vörn. Við reyndum að minnka svæðisvörnina og fara meira maður á mann. Taka leikinn í okkar hendur.“

Sjálfur var Geks í miklu stuði en hann skoraði 24 stig í kvöld, þar af voru sex þristar.

„Þetta er held ég einn af mínum bestu leikjum á tímabilinu. Ég var í stuði í sókninni, fékk góðar sendingar frá liðsfélögunum og setti skotin niður.“