Glódís fagnaði í miklum tímamótaleik

Glódís er fyrirliði Bayern og nánast alltaf í byrjunarliði en í tímamótaleiknum í kvöld, sjálfsagt vegna stórleiksins við Barcelona sem bíður á sunnudaginn, kom hún inná sem varamaður.

Bayern mætti þá Werder Bremen á útivelli og fagnaði 2-0 sigri í þessum hundraðasta deildarleik Glódísar í Þýskalandi. Hún lék síðustu tuttugu mínúturnar en þá þegar höfðu Natalia Padilla-Bidas og Pernille Harder, úr víti, skorað mörkin tvö.

Glódís hefur átt gríðarlegri velgengni að fagna með Bayern frá því að hún kom til félagsins frá Rosengård í Svíþjóð sumarið 2021. Hún hefur nú orðið Þýskalandsmeistari með liðinu fjögur ár í röð og hefur Bayern haft mikla yfirburði í vetur, unnið 22 af 23 leikjum og gert eitt jafntefli, og er liðið heilum 18 stigum á undan næsta liði, Wolfsburg. Bayern hefur núna unnið tuttugu deildarleiki í röð.

Eins og fyrr segir er næsti leikur Bayern við Barcelona, á Spáni á sunnudaginn, eftir að liðin gerðu 1-1 jafntefli í Þýskalandi í fyrri leik sínum í undanúrslitum Meistaradeildar Evrópu. Bayern á einnig eftir þrjá deildarleiki og úrslitaleik við Wolfsburg 14. maí í þýska bikarnum, og gæti því enn unnið þrennuna eftirsóttu.