Heims­meistari mætir og ætlar að slá met í Dyrfjallahlaupinu

Dyrfjallahlaupið fer fram þann 4. júlí næstkomandi en hlaupið er er þekkt fyrir stórbrotna náttúru og krefjandi hlaupaleiðir þar sem farið er um eitt fegursta hlaupa- og göngusvæði landsins, Víknaslóðir, í nágrenni við Borgarfjörð eystri.

Tove Alexandersson er stigahæsta kona heims á heimslista ITRA (International Trail Running Association) og varð heimsmeistari í utanvegahlaupum á heimsmeistaramótinu í Canfranc í september síðastliðnum.

Hana þarf vart að vart að kynna fyrir áhugafólki um utanvegahlaup. Hún er ríkjandi heimsmeistari í utanvegahlaupum og hefur unnið tæplega þrjátíu heimsmeistaratitla í rathlaupi og skíðarathlaupi. Þetta verður í fyrsta sinn sem hún keppir á Íslandi.

Sannur heiður fyrir hlaupið

Olgeir Pétursson, hlaupastjóri Dyrfjallahlaupsins, segir þetta ótrúlega spennandi viðburð:

„Tove er besta utanvega-hlaupakona heims í dag og það er okkur sannur heiður að hún skyldi velja Dyrfjallahlaupið fyrir sína fyrstu keppni á Íslandi. Hún ætlar að hlaupa 24 km leiðina okkar, sem er mjög hröð fyrri helminginn en fer svo í gegnum tvö fjallaskörð sem eru vel krefjandi . Það verður ótrúlega spennandi að sjá hversu hratt hún kemst yfir.”

Skorar á íslenska landsliðið

Friðleifur, formaður langhlaupanefndar FRÍ, bætir við að íslensku hlaupaelítunni sé boðið að taka þátt í þessari sögulegu keppni:

„Allt landsliðið í utanvegahlaupum er komið með boðsmiða í hlaupið og ég skora á þau öll að koma og veita Tove alvöru keppni á íslenskri grundu. Og í rauninni bara öll sem elska góða áskorun og vilja máta sig við Tove í frábærri keppnisbraut.“

Markmiðið stærra en bara brautarmet

Búist er við því að Tove geri alvarlega atlögu að brautarmeti kvenna, sem Andrea Kolbeinsdóttir á nú (2:22:40).

Markmiðið er þó stærra að sögn mótshaldara, en engin kona hefur enn farið brautina undir tveimur klukkustundum.

Til samanburðar á Þorbergur Ingi Jónsson brautarmet karla, 1:55:58, og verður fróðlegt að sjá hversu nálægt því meti besta kona heims kemst, spurning hvort að hún nái að slá það.