Vilja ræða um varnargarða en byggja meira á hraunum

Kristján Már Unnarsson skrifar 22. apríl 2026 20:20

Valdimar Víðisson, bæjarstjóri í Hafnarfirði. Sigurjón Ólason

Bæjaryfirvöld í Hafnarfirði kalla eftir samtali við ríkið um mótvægisaðgerðir, eins og að undirbúa gerð varnargarða, vegna nýrrar skýrslu Veðurstofu um hættu á hraunrennsli yfir hluta byggðarinnar. Bæjarstjórinn telur ekki ástæðu til að falla frá áætlunum um ný hverfi á hraunasvæðum.

Í kvöldfréttum Sýnar var sýnt frá Völlunum í Hafnarfirði og iðnaðarsvæðinu í Kapelluhrauni en þau eru sögð berskjölduð fyrir hraunflæði. Þau standa á ungum hraunum sem runnu eftir landnám, en Kapelluhraun er frá 12. öld og Hellnahraun frá 10. öld.

Meginniðurstaða Veðurstofunnar er í raun ekki flókin. Þar sem hraun hefur runnið, þar má búast við að hraun geti runnið aftur.

Horft yfir Vallahverfi. Hraunið, sem stór hluti hverfisins er byggður á, Hellnahraun, rann eftir landnám.Sigurjón Ólason

Bæjarstjórinn kveðst fagna skýrslunum.

„Hér er um að ræða langtímaáhættumat en ekki spá. Þannig að þetta er auðvitað eitthvað sem er til lengri tíma en gefur okkur færi til þess að skoða alla innviði hjá okkur, skipulag og framtíðarskipulag,“ segir Valdimar Víðisson, bæjarstjóri í Hafnarfirði.

Bæjaryfirvöld efndu í morgun til fundar um hraunvárskýrslurnar með fulltrúum allra framboða. En verður samstaða um þessi mál innan bæjarstjórnar?

„Það er lykilatriði í þessu máli upp á öryggi íbúa. Því mér finnst öryggi íbúa ekki eiga að vera pólitískt mál.

Hér þarf samstöðu og þess vegna vorum við með þennan fund með öllum framboðum til þess að allir séu á sömu blaðsíðu með réttar upplýsingar til að geta komið réttum skilaboðum út til almennings,“ svarar bæjarstjórinn.

Fimm líklegustu hraunrennslisleiðir í átt að byggðinni á Reykjavíkursvæðinu. Farvegir 1 og 2 stefna inn í Hafnarfjörð.Veðurstofan

Næstu skref voru rædd á fundi bæjarstjórnar í dag.

„Við þurfum vissulega að fara í og köllum eftir samtali auðvitað við ríkið um mótvægisaðgerðir, sem þarf að fara í. Við þurfum að herma slíka varnargarða. Það þarf að setja þá inn í líkön og sjá hvernig þeir geta best komið í sveitarfélaginu okkar, þannig að það verði alveg ljóst hvar þeir ættu þá að rísa þegar upp kemur eldgos.“

Bæjarstjórinn sér þó ekki fyrir sér að fallið verði frá áætlunum um ný hverfi á hraunasvæðum, eins og heyra má hér í sjónvarpsfrétt Sýnar:

-Þurfið þið að endurskoða það?

„Ég tel ekki að við þurfum að endurskoða það. Við erum þegar komin með þá áætlun á skipulagi.

Við þurfum hins vegar að skoða hvernig við bregðumst við ef til atburða kemur, til lengri tíma.

Þannig að við erum komin með skýrsluna núna í hendur til þess einmitt að skoða og meta hvernig við getum brugðist við hvað mótvægisaðgerðir varðar. Og hvað við gerum til að endurskoða það skipulag sem fyrir er og er til framtíðar.“

Séð yfir iðnaðarsvæðið í Kapelluhrauni. Hraunið rann á 12. öld.Sigurjón Ólason

-En geta skýrslur af þessu tagi leitt til þess að fasteignaverð á umræddum svæðum gæti lækkað?

„Slík umræða hefur auðvitað komið. En ég vona auðvitað að svo verði ekki. Af því að þessi skýrsla er einmitt til þess gerð og fallin að við grípum til aðgerða til að tryggja innviði og öryggi íbúa í Hafnarfirði,“ svarar bæjarstjórinn Valdimar Víðisson.

Helstu atriðum úr áhættumati Veðurstofu var lýst í sjónvarpsfrétt Sýnar í gærkvöldi:

Hafnarfjörður Almannavarnir Eldgos á Reykjanesskaga Skipulag Eldgos og jarðhræringar Varnargarðar á Reykjanesskaga

Tengdar fréttir

Skýrslur um hraunvá kalla á samtal um hvar megi byggja

Hildigunnur Thorsteinsson veðurstofustjóri segir nýjar skýrslur um hættusvæði vegna hraunrennslis kalla á umræðu um það hvort setja þurfi skýrari reglur um hvar megi skipuleggja byggð.

22. apríl 2026 13:50

Grindavík og Hveragerði talin í mestri hættu vegna eldgosa

Tvö bæjarfélög suðvestanlands, Grindavík og Hveragerði, eru á svæðum á efsta hættustigi í nýju áhættumati Veðurstofu Íslands vegna eldfjallavár á Reykjanesskaga. Hluti Hafnarfjarðar er mjög nærri svæðum þar sem mjög mikil hætta er á hraunflæði. Líkur á gosupptökum eða hraunflæði eru annars metnar litlar á meginhluta höfuðborgarsvæðisins. Allar jarðvarmavirkjanir á Reykjanesfjallgarði; virkjanirnar á Reykjanesi, í Svartsengi, á Hellisheiði og á Nesjavöllum, eru staðsettar á svæðum sem flokkast á efsta hættustigi.

21. apríl 2026 15:30

Við þurfum að vera tilbúin að takast á við eldgosavá

Líkur á hraunflæði í byggð eru metnar litlar á meginhluta höfuðborgarsvæðisins í nýju áhættumati Veðurstofu Íslands vegna eldfjallavár á Reykjanesskaga. Tvö bæjarfélög, Grindavík og Hveragerði, eru talin í mestri hættu sem og hluti Hafnarfjarðar.

21. apríl 2026 22:10

Mest lesið

Fleiri fréttir