Völdu kærustu hennar líka númer eitt

Hin 23 ára gamla Fudd var valin fyrst í nýliðavali WNBA-deildarinnar í ár. Hún mun ganga til liðs við Dallas Wings – sem er einmitt sama lið og hin 24 ára Bueckers spilar með.

Báðar íþróttakonurnar spiluðu háskólakörfubolta með University of Connecticut og opinberuðu samband sitt í júlí 2025.

„Ég er spennt fyrir því að spila aftur með Paige,“ sagði Fudd í samtali við ESPN eftir valið. Parið vann saman háskólameistaratitilinn árið 2025.

„Hún er ótrúleg manneskja, ótrúlegur leikmaður og þetta verður mjög gaman,“ hélt Fudd áfram um kærustu sína. Bueckers var með 19,2 stig og 5,4 stoðsendingar að meðaltali í leik á sínu fyrsta tímabili í WNBA en hún var kosin nýliði ársins í deildinni.

Bueckers, sem sat meðal áhorfenda, sást brosa þegar hún horfði á Fudd dásama framtíð þeirra á þessari stóru stund.

Fudd og Bueckers hafa verið stjörnupar frá upphafi. Þær hittust fyrst þegar þær reyndu að komast í sextán ára landslið Bandaríkjanna árið 2017, komust báðar í liðið og unnu síðan gull.

Það var líka Bueckers sem hvatti Fudd til að ganga til liðs við UConn-skólann.

„Paige er sú tegund af liðsfélaga sem allir vilja spila með því hún er svo óeigingjörn,“ sagði Fudd við Glamour í ágúst 2025. „Leikstíll hennar dregur alla með. Hún er líka bara frábær leikmaður, svo hún laðar að sér svo mikla athygli að það auðveldar öllum öðrum að fá góð færi og tækifæri á vellinum.“

Í sama viðtali ræddi Fudd opinskátt við tímaritið um hvernig það yrði ef hún lenti einhvern tímann í sama WNBA-liði og Bueckers, eða ef þær yrðu keppinautar.

„Ég myndi svo sannarlega vilja spila með henni aftur; á sama tíma myndi ég gjarnan vilja spila á móti henni,“ bætti hún við. „Ég held að það sé í raun sigur fyrir báða. Það er enginn slæmur kostur.“

Líkt og Fudd var Bueckers einnig valin fyrst í nýliðavali WNBA-deildarinnar árið 2025 af Dallas Wings.