Ferða­lagið hans Jeb Ivey: Spurði Inga hvort hann væri brjálaður

Þegar ljóst var að Sean Burton myndi ekki geta spilað meira með Snæfelli í úrslitaeinvíginu gegn Keflavík þurftu Hólmarar að hafa hraðar hendur við að finna bandarískan leikmann.

Ivey var íslensku körfuboltaáhugafólki að góðu kunnur eftir að hafa spilað með KFÍ, Fjölni og Njarðvík. Vorið 2010 var hann fastur í Finnlandi vegna eldgossins í Eyjafjallajökli og Hólmarar sáu sér leik á borði.

„Fyrsta línan var: Ertu brjálaður? En svo þegar hann áttaði sig á því að ég var ekki brjálaður var hann tilbúinn,“ sagði Ingi Þór Steinþórsson, sem var þjálfari Snæfells 2010, er hann rifjaði fyrstu samskipti sín við Ivey upp.

Ivey var tilbúinn að hjálpa Snæfelli í baráttunni um Íslandsmeistaratitilinn en svo þurfti að koma honum til Íslands sem var hægara sagt en gert. Við tók langt og strangt ferðalag hjá bandaríska leikstjórnandanum, frá Joensuu í Finnlandi og alla leið í Stykkishólm.

„Þetta er nánast lygasaga,“ sagði Hlynur Bæringsson sem var fyrirliði Snæfells á þessum tíma.

Þriðji þáttur Augnablikanna, „Ferðalagið hans Jeb Ivey“, verður sýndur klukkan 20:00 á Sýn Sport Ísland í kvöld. Strax að honum loknum verður þátturinn „Kraftaverkið í Barcelona“ sýndur.