Alltaf jafn hressandi að fara út og tala að­eins við hundinn

Í kaffispjalli um helgar er rætt við fólk í ólíkum störfum. Við spyrjum alltaf um hvenær fólk vaknar á morgnana, hvað það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég fer yfirleitt frammúr um sjö á morgnana, pikka í krakkana og fer svo út með hundinn. Ætla mér reyndar alltaf að vakna fyrr til að hafa meiri tíma fyrir hundinn og sjálfan mig á morgnana en það hefur reynst erfitt að vakna fyrr, finnst alltof gott að snúsa tvisvar áður en ég fer frammúr.

Ég tek reyndar inn á milli skorpur í að vakna 6.30 en held það yfirleitt ekki lengi út. Þá reyni ég inn á milli að fara í ræktina fyrir vinnu þegar skipulag heimilisins leyfir það og mæti svo ferskur á skrifstofuna.“

Hvað er það fyrsta sem þú gerir á morgnana?

„Flesta morgna þá byrja ég á að fá mér vítamín, vatnsglas og fer svo út með hundinn í morgungöngu.

Hundurinn vaknar alltaf mjög sprækur á morgnana og byrjar að suða í mér að fara út og fá að borða.

Þó að það geti verið erfitt að koma sér af stað yfir veturinn þegar veðrið er slæmt þá er þetta alltaf jafn gott eftir á að fara út, tala aðeins við hundinn og vakna vel. 

Fer svo í sturtu og fæ mér kaffibolla áður en ég skutla miðjubarninu í skólann.“

Hvaða skemmtilegu eða fyndnu páskaminningu úr æsku heldur þú alltaf sérstaklega upp á?

„Páskarnir hafa alltaf verið frábærir bæði í minningunni og einnig nú til dags. Þeir hafa alltaf einkennst af samveru með fjölskyldunni. 

Á seinni árum hafa þeir verið yndislegir. Þegar allt er á fullu alla daga í vinnu, sjálfboðaliðastörfum og samveru með fjölskyldunni, finnst mér páskarnir alltaf koma á frábærum tíma til að stimpla sig út, fara í sumarbústaðinn og núllstilla sig í rólegum heitum úti í náttúrunni með fjölskyldunni.“

Í hvaða verkefni ertu að vinna helst þessa dagana?

„Það eru mörg verkefni á borðinu eins og er. Við erum með mörg stór framkvæmdaverkefni í gangi núna sem krefst mikillar skipulagningar. Ég er heppinn að vinna með frábæru teymi starfsmanna og eins og er erum við mikið að skipuleggja verkefnin sem eiga að fara í gang í sumar. Sumarið er sá tími þar sem mest er um að vera og mjög mikilvægt fyrir okkur að allt gangi upp og að við stöndumst tímaáætlanir.

Svo er ég líka að vinna í nýrri framtíðarstefnu fyrirtækisins til næstu ára með stjórnendum og starfsfólki. Við settum framtíðarsýn fyrir fyrirtækið fyrir þremur árum sem hefur ræst vel úr. Áherslan þá var meðal annars að stækka fyrirtækið bæði með innri og ytri vexti. 

Á síðustu tveimur árum keyptum tvö fyrirtæki sem harmonira vel við starfsemi Terra Eininga. Nú er komið að því að endurheimsækja stefnuna og framlengja fram í tímann, með skýrum markmiðum og áherslum til að halda áfram þeirri vegferð sem við höfum verið á.

Svo fyrir utan vinnu er ég í sjálfboðavinnu fyrir handboltadeild Vals. Mikill áhugi er innan fjölskyldunnar á handbolta og er öll fjölskyldan með í því.“

Hvernig skipuleggur þú þig í vinnu?

„Almennt séð er ég nokkuð vel skipulagður enda í mörg horn að líta og auðvelt að gleyma einhverjum hlutum í amstri dagsins. 

Ég hef farið marga hringi með hvernig best er að skipuleggja mig. Nota ýmis tól til skipulagningar en er reyndar búinn að komast að því að gamla góða stílabókin er að virka best fyrir mig. Hef hana opna fyrir framan mig á borðinu með öllum punktunum sem ég hef skrifað í hana. Þannig næ ég að vinna í þeim málum sem eru mikilvægust svo engir boltar detti í gólfið.

Finnst mjög mikilvægt að hafa góða yfirsýn yfir gang mála, vinn mikið út frá tölulegum gögnum og skoða þau daglega til að átta mig á þróuninni og hvaða áherslumál þarf að vinna í. 

Þá vinn ég ásamt stjórnendateyminu mínu alltaf með lykilverkefni fyrirtækisins ofarlega á lista, áttum einmitt vinnufund fyrir um viku síðan þar sem við vorum að taka stöðuna á þeim og ákveða áherslur næsta ársfjórðungs.“

Hvenær ferðu að sofa á kvöldin?

„Mér finnst mjög gott að fara snemma upp í rúm og ætla mér alltaf að fara að sofa strax. Er oft kominn upp í um 22 á kvöldin en vandamálið sem ég er að reyna að vinda ofan af er að ég á það til að detta í símann í eitthvað heilalaust áhorf sem ég festist oft yfir.

En finnst reyndar rosalega gott að setja fróðlegt podcast í gang til að sofna yfir.“