„Það er búinn að vera stígandi í hópnum í allan vetur“

„Við byrjuðum leikinn vel og gekk fyrri hálfleikur vel upp hjá okkur. Við vorum í smá brasi á köflum með hápressuna en heilt yfir góð byrjun og flottur leikur af okkar hálfu,“ sagði Ian Jeffs, þjálfari Breiðabliks, eftir leikinn.

Ian tók við liðinu eftir síðasta tímabil og hefur þurft að endurbyggja hópinn að einhverju leyti eftir að lykilleikmenn voru seldir frá félaginu. Ungir leikmenn hafa stigið upp og tekið miklum framförum eins og sást í dag.

„Leikmenn sem voru kannski ekki í stóru hlutverki í fyrra hafi stigið upp og það er það sem við vorum að vonast eftir. Leikmenn sem voru í lykilhlutverkum í fyrra hafa svo stigið enn frekar og við erum mjög ánægð með það líka. Það er gott jafnvægi og þetta lítur ágætlega út.“

„Það er búinn að vera stígandi í hópnum í allan vetur. Við fórum seint af stað og fengum erfiða evrópuleiki á móti Hacken sem er mjög gott lið en það var frábær undirbúningur fyrir okkur. Þar lentum við í smá mótlæti sem styrkir okkur og mér finnst við hafa náð að svara fyrir það.“

Blikar sóttu markvörð frá Bandaríkjunum á dögunum en hún mun veita Herdísi Höllu Guðbjartsdóttur samkeppni um markvarðarstöðuna í sumar. Ian talaði þó einnig um fleiri leikmenn sem væru að koma úr meiðslum eða háskóla í Bandaríkjunum og býst hann við aukinni samkeppni um ýmsar stöður vallarins.

„Herdís er okkar aðalmarkvörður og Taylor vissi að hún kæmi á þeim forsendum að við værum með markvörð. Hún er að koma til okkar til að berjast um sæti og veita Herdísi samkeppni. Hún þarf að vera á tánum eins og með alla aðra leikmenn. Það er samkeppni og við viljum auka samkeppnina og hafa meiri breidd.“