Skoraði 103 stig í körfuboltaleik

Hinn átján ára gamli Nantti Ruuhilahti skoraði 103 stig í finnsku U19-deildinni í körfubolta þegar lið hans, WB-Pantterit frá Helsinki, vann ótrúlegan 186–77 sigur á BC Nokia.

Samkvæmt finnska blaðinu Yle er talið að frammistaða Ruuhilahti á dögunum hafi slegið öll fyrri stigamet í finnskum körfuboltadeildum, bæði í yngri flokkum og meistaraflokki.

Hann fór stuttlega yfir leikinn í viðtali við Yle og hrósaði liðsfélögum sínum fyrir frammistöðuna.

„Það voru margar stoðsendingar og mikil liðsvinna. Ég varð bara sjóðheitur. Skotin duttu vel. Þannig komu 103 stigin. Maður getur aldrei búist við því að skotin detti svona. Þegar fyrstu 23 stigin voru komin fór mér að finnast að há stigatala væri möguleg,“ sagði Ruuhilahti.

„Þegar ég var kominn með 68 stig í hálfleik ákváðum við að reyna að ná 100,“ bætti Ruuhilahti við.

Ruuhilahti spilaði rúmar 33 mínútur í leiknum. Hann tók 55 tveggja stiga skot og hitti úr 39 þeirra. Hann hitti einnig úr 3 af 4 þriggja stiga skotum. Þar að auki setti hann niður 16 vítaskot af 23 tilraunum. Hann tók einnig átta fráköst, stal fimm boltum og gaf tvær stoðsendingar.

Ruuhilahti skoraði 23 stig á aðeins fyrstu fjórum og hálfu mínútunni. Fyrir þennan leik hafði besta frammistaða hans í einum leik í finnsku U19-deildinni á þessu tímabili verið 33 stig.

Ruuhilahti hefur þegar fengið tilboð frá mörgum háskólaliðum, þar á meðal South Carolina og Drake en hann útskrifast ekki fyrr en vorið 2027.