Af og frá að við­ræður séu hafnar

Þó Þorgerður nefni það ekki beint er tilurð skrifa hennar vafalaust frétt Morgunblaðsins frá því í morgun og skrif Ólafs Ragnars Grímsson, fyrrverandi forseta Íslands, á samfélagsmiðlinum X undanfarna viku. Þorgerður skrifar á Facebook að verið sé að afvegaleiða umræðuna með þessum skrifum. 

 Ólafur sagði á samfélagsmiðlinum X að samningaviðræður Íslands við Evrópusambandið væru þegar hafnar, og það áður en þjóðin greiðir atkvæði um áframhaldandi viðræður 29. ágúst næstkomandi.

Sú túlkun hans kom meðal annars í kjölfar færslu Mörtu Kos, stækkunarstjóra Evrópusambandsins, eftir fund hennar með Þorgerði í Brussel, þar sem Marta sagði að ef Íslendingar kysu að halda áfram viðræðum væri ESB staðráðið í að flýta samningaviðræðum um forgangsmál Íslands. Hún sagði jafnframt að þær hefðu rætt „sérstakar aðstæður Íslands“.

Í frétt Morgunblaðsins frá því í morgun var síðan haft eftir viðmælendum að Þorgerður teldi líklegra að Evrópusambandið tæki upp íslenska fiskveiðistjórnunarkerfið en að Ísland lagaði sig að sameiginlegri sjávarútvegsstefnu sambandsins. Þetta á Þorgerður að hafa sagt á fundi með forvígismönnum íslenskra millilandaviðskiptaráða á fundi í utanríkisráðuneytinu í síðustu viku. Þá var jafnframt haft eftir viðmælanda að Þorgerður hefði sagt að embætti fiskveiðikommissara gæti komið í hlut Íslendings ef til aðildar kæmi.

Ólafur Ragnar skrifaði um þessa frétt Morgunblaðsins á X í morgun þar sem hann sagði að samkvæmt fréttinni væri Þorgerður virkilega stolt af árangri sínum í viðræðum við Evrópusambandið.

Þorgerður vísar ekki beint í frétt Morgunblaðsins eða skrif Ólafs Ragnars en segir að ákveðin hagsmunaöfl hér á landi vinni leynt og ljóst að því að ala á ótta og tortryggni í garð þjóðaratkvæðagreiðslunnar og Evrópusambandsins. Hún segir andstæðinga EES-samningsins hafa beitt sömu aðferðum á sínum tíma en sagan sýni að samningurinn sé sá allra mikilvægasti viðskiptasamningur sem Íslendingar hafi gert.

„Þetta mál er mun stærra en svo að nokkrir útvaldir hagsmunaaðilar fái að ákveða og hafa áhrif á hvað okkur er fyrir bestu. Sömu aðilar og stóðu að baki stjórnarandstöðuflokkunum í lengsta málþófi sögunnar síðasta sumar, í máli sem snerist um að þjóðin fengi réttláta hlutdeild í hennar eigin fiskveiðiauðlind. Þjóðin sá það sem betur fer í gegnum sérhagsmunagæsluna þá. Og ég veit að hún gerir það aftur núna.“

Þorgerður segir að ríkisstjórnin sé að taka eitt skref í einu í þessu máli, meta stöðuna og vanda sig fyrir Ísland.

„Það er enginn kominn lengra og það fer enginn lengra nema þjóðin segi já. Sama hvað sagt er og reynt er að fullyrða þá er það ferlið sem við erum að vinna eftir. Einfaldara verður það ekki.“

Undanfarið hefur komið ákall frá stjórnarandstöðuflokkum um að Þorgerður Katrín og ríkisstjórnin geri grein fyrir hvað hafi farið á milli þeirra og fulltrúa Evrópusambandsins í aðdraganda þess að þingsályktunartillaga um þjóðaratkvæðagreiðslu um áframhaldandi viðræður var lögð fram. Þorgerður mun mæta til fundar við utanríkismálanefnd Alþingis í fyrramálið þar sem búast má fastlega við að fulltrúar minnihlutans í utanríkismálanefnd muni óska svara frá ráðherra um það.