„Skutum í hringinn en ekki í körfuna“

„Ég er bara ánægður með að hafa unnið en ekki tapað. Það er bara þannig sem ég met þennan leik“, sagði Baldur þegar hann var spurður að því hvernig hann mæti sigurleikinn gegn ÍA.

Hann var þá spurður hvort hann hafi verið óánægður með frammistöðu sinna manna en hann þurfti að birsta sig við leikmenn sína í leikhléi í lok leiks þegar leikurinn var í járnum.

„Varnarlega erum við ömurlegir. Við skorum nánast að vild en varnarlega var þetta bara lélegt. Mér fannst við ekki keppa að fullum krafti en á sama tíma eru Darryl og Zudzum og fleiri, þeir eru ekki lélegir í körfu, þeir voru árásargjarnir og tóku það sem við vorum að gefa þeim. Varnarlega náðum við aldrei stjórn á þessum leik.“

Stjarnan fór á nokkur áhlaup í dag og virtust ráða því hvenær forskotið yrði aukið. Alltaf stigu þeir þó af bensíngjöfinni og hleyptu Skagamönnum inn í leikinn.

„Þegar þeir voru að komast inn í leikinn þá var það alltaf sama sagan. Við héldum áfram að skjóta galopnum skotum, þriggja stiga eða sniðskotum, við skutum bara í hringinn en ekki í körfuna. Við hefðum getað skorað 140 stig hérna í dag. Þetta var bara ekki leikur að mínu skapi. Við vorum lélegir varnarlega og ekki eins mikil keppni og ég hefði viljað. Sérstaklega á hálfum velli.“

„En ég ætla bara að vera glaður með sigurinn og fagna honum. Því það er hundleiðinlegt að tapa og skemmtilegra að vinna og það þýðir ekkert að vera bara í þyngslunum og neikvæðni endalaust. Þetta var bara góður sóknarleikur og við skoruðum mikið. Svo lögum við bara hitt“, sagði Baldur að lokum áður og gat leyft sér að brosa. Stjarnan jafnar Tindastól að stigum í deildinni og lyftir sér upp í annað sætið. Þar verða þeir þangað til á morgun í það minnsta þegar Tindastóll etur kappi við Álftanes.