„Þórsarinn er svo geggjaður“

Þórsarar missa af úrslitakeppninni en halda sér uppi.

Brynjar var með blendnar tilfinningar eftir rosalegan leik og fór yfir leikinn og tímabilið.

„Ég veit það ekki. Ég er eiginlega brjálaður en á sama tíma bara flott skilurðu, þannig örugglega mjög skemmtilegur leikur fyrir áhorfendur.“

Þórsarar byrjuðu ekki nægilega vel og lentu snemma 4-1 undir, en hvað orsakaði þessa vondu byrjun?

„Ég veit það ekki, mér fannst við byrja allt í lagi. Við byrjuðum hægt og þeir náðu bara yfirhöndinni skilurðu. Þeir voru bara að mjatla þetta og þetta fór aldrei yfir einhver þrjú mörk þannig það var aldrei neitt stress eða neitt.“

Stemningin í Íþróttahöllinni var algjörlega frábær og hávaðinn og lætin eftir því og segir Brynjar frábært að fá að spila við þessar aðstæður.

„Þetta er bara ógeðslega gaman. Þórsarinn er svo geggjaður og þetta er ólýsanlegt í alvöru talað.“

Þórsarar gátu með sigri komist í úrslitakeppnina en á sama tíma hefði HK þurft að tapa fyrir Haukum. HK vann að lokum Hauka og skiptu þá úrslitin ein og sér ekki máli fyrir Þórsara sem vissu þó ekki stöðuna í leiknum og voru því líklega farnir að sjá úrslitakeppnina í hyllingum þegar vel á stóð í leiknum og því eflaust miklar tilfinningar fram og til baka hjá leikmönnum.

„Við náttúrulega fengum bara blóð á tennurnar, vinna þennan leik og komast í úrslitakeppni. Við erum búnir að vera alveg nokkuð flottir í síðustu leikjum, sigur á móti Aftureldingu og við komum í þennan leik og bara vinna og úrslitakeppni og geggjað en svo náttúrulega á sama tíma erum við búnir að tryggja sætið okkar sem var markmiðið okkar fyrir tímabilið, og ég er bara ógeðslega ánægður með það. Fá að koma hérna og allt að vinna.“

„Eftir áramót erum við bara búnir að vera helvíti góðir. Við fórum að vinna einmitt þessa jöfnu leiki sem við vorum ekki að ná, vorum að tapa hérna með einu, tveimur, jafntefli og svo einhvern veginn náum við einum og þá kemur sigurtilfinningin og svo náum við öðrum og meira. Við ljúkum þessu tímabili bara á mjög flottum stað sem lið, bara góðum stað, ég vil meina að við hefðum farið á flug í þessari úrslitakeppni, en það er bara eins og það er“, sagði Brynjar léttur í bragði.

Þórsliðið er skipað uppöldum leikmönnum að langmestu leyti og er eflaust mikill drifkraftur fyrir liðið að halda sér uppi og koma inn í næsta tímabil fullt sjálfstrausts.

„Eins og ég sagði áðan, markmið eitt, tvö og þrjú, þegar þú kemur svona upp, er að halda sæti sínu og nú er það bara nýtt tímabil, meiri vinna og að vita að við eigum bara að vera hérna og eins og ég segi, nú þarf stjórnin bara að fara hringja og sjá hvað er í boði og svo nætum við bara massívir á næsta tímabili“, sagði Brynjar að lokum.