Hleypur kíló­metra hring hundrað sinnum og stefnir á stigamet

Arnar hefur verið einn albesti hlaupari landsins í langan tíma og undanfarið einbeitt sér að enn lengri vegalengdum en vanalega. Næst á dagskrá er hundrað kílómetra hlaup í Slóveníu þann 28. mars.

„Markmiðið þar er að reyna að hlaupa stigahæsta afrek Íslendings í götuhlaupi. Ég þyrfti þá að hlaupa í kringum 3:49 meðal pace í hundrað kílómetra. Það þýðir að ég er að fara í gegnum maraþon á rétt undir 2 tímum og 40 mínútum, og geri það tvisvar og hálfu sinnum,“ sagði Arnar.

En þetta hundrað kílómetra hlaup spannar ekki hundrað kílómetra braut heldur er einn og sami eins kílómetra hringurinn hlaupinn hundrað sinnum. Sem verður væntanlega mikil andleg áskorun.

„Þarna viltu hugsa bara um tímann, frekar en vegalengdina. Ég veit að ég ætla að vera svona 6 klukkutíma og 20 mínútur, eitthvað í kringum það. Þannig að ég veit bara hversu mikill tími er eftir, en leyfi bara kílómetrunum að koma.“

Arnar er líka byrjaður að undirbúa andlegu hliðina með því að hlaupa mjög tilbreytingalaus hlaup á hlaupabretti.

„Ég tók til dæmis maraþonæfingu í gær, þar sem ég hljóp maraþon á brettinu. Stillti bara hraðann á brettinu og hljóp. Það var líka æfing í því að innstilla sig inn á hraðann, ekki hreyfa neitt við brettinu og bara halda.“

Stigametið sem Arnar stefnir á að slá er í eigu Baldvins Þórs Magnússonar en Baldvin setti stigametið samhliða Íslandsmeti sínu í 10 kílómetra hlaupi í Valencia síðasta janúar.

„Þetta gefur manni bara extra hvatningu [að hafa svona markmið]. Af því ég veit að þetta á eftir að verða ógeðslega erfitt á einhverjum tímapunkti, en þá er maður með fleiri hluti til að ýta sér áfram.“

Fjallað var um væntanlegt hundrað kílómetra hlaup Arnars í Sportpakka Sýnar í gærkvöldi. Innslagið má sjá í spilaranum að ofan.