KSÍ fylgist með fram­vindu mála í Mexíkó

Frá þessu greinir Eysteinn Pétur Lárusson, framkvæmdastjóri KSÍ, í samtali við Vísi. Fulltrúar sambandsins í Mexíkó sofa enn, enda mið nótt þar vesturfrá.

KSÍ átti samtöl við mexíkóska knattspyrnusambandið og aðra viðeigandi aðila í gær og var niðurstaða þeirra viðræðna að leikurinn færi fram, héldist núverandi ástand óbreytt.

Framhaldið veltur á því hvernig því ástandi vindur fram.

Aðilar að CJNG glæpagenginu stóðu að hefndaraðgerðum víða um Mexíkó í nótt vegna dráps mexíkóska hersins á El Mencho, foringja glæpasamtakanna.

Í það minnsta fjórum fótboltaleikjum var aflýst í nótt vegna þess. Þar á meðal var leikur Queretaro við Juarez.

Íslenska landsliðið er statt í Queretaro og á að mæta Mexíkó þar klukkan 2:00 á aðfaranótt fimmtudags.

Landsliðið æfði vandræðalaust í borginni í gær.

Nánar verður rætt við Eystein í hádegisfréttum Bylgjunnar þegar frekari upplýsingar liggja fyrir.