Glódís og stöllur unnu toppslaginn og eru með fjór­tán stiga for­skot

Bayern er nú með fjórtán stiga forskot á Wolfsburg á toppnum. Bæjarar hafa unnið sautján af átján deildarleikjum sínum á tímabilinu og gert eitt jafntefli.

Wolfsburg leiddi í hálfleik eftir að Kessya Bussy skoraði á 16. mínútu. Í seinni hálfleik sýndi Bayern hins vegar mátt sinn og megin.

Jovana Damnjanovic skoraði tvö mörk á þremur mínútum snemma í seinni hálfleik og Georgia Stanway og Klara Buhl bættu svo við mörkum.

Glódís lék allan leikinn í vörn Bayern en hún er sem kunnugt er fyrirliði liðsins.

Bayern hefur orðið þýskur meistari þrjú ár í röð og allt bendir til þess að fjórði titillinn vinnist í vor.