Rann á blásara utan­gátta starfs­manns

Mikil snjókoma hafði áhrif á norrænu tvíkeppnina í dag og brugðu mótshaldarar á það ráð að láta hóp starfsmanna blása nýföllnum snjó af skíðastökksbrekkunni, á milli þess sem keppendur stukku.

Einn starfsmaður gleymdi sér hins vegar við blásturinn þannig að Loomis rann á blásarann en náði engu að síður ágætu stökki eins og sjá má.

„Ég hef aldrei upplifað eitthvað þessu líkt. Sem betur fer gerðist þetta efst og ég reyndi bara að tala við sjálfan mig um að ná góðu stökki,“ sagði Loomis við NRK.

„Þegar ég fór af stað hugsaði ég með mér hvor hann myndi ekki færa sig. Þetta var ekki vont en það sá á fötunum mínum. Sem betur fer fór þetta bara í öxlina mína. Ef þetta hefði farið í andlitið mitt þá hefði niðurstaðan getað orðið allt önnur,“ sagði Loomis.

Hann náði um 116 metra stökki og til greina kom að fara fram á nýtt stökk en vegna þess hve snjókoman var mikil töldu Bandaríkjamennirnir það ekki þess virði.

Lasse Ottesen, brautarstjóri alþjóðaskíðasambandsins, segir manninn sem gleymdi sér hafa beðist afsökunar. „Aðstæðurnar voru mjög krefjandi. Teymið stóð sig frábærlega. Mjög óheppilegt það sem kom fyrir með Loomis. Það var gott að það skyldi ekkert meira gerast en svona á ekki að gerast,“ sagði Ottesen.