Hundur Lindsey Vonn dó daginn eftir að hún fót­brotnaði á ÓL

Vonn hefur birt nokkrar færslur á Instagram eftir áreksturinn og á miðvikudaginn deildi hún afar sorglegum fréttum.

Það er eitt að lenda í slíkum meiðslum og missa af möguleika á að keppa um verðlaun á Ólympíuleikunum en lenda líka á sama tíma í miklum missi.

Sennilega þeir erfiðustu á ævinni

„Síðustu dagar hafa verið ótrúlega erfiðir, sennilega þeir erfiðustu á ævi minni. Ég er enn ekki búin að meðtaka að hann sé farinn“, skrifaði Vonn.

Hún segir að hundurinn Leo hafi nýlega verið greindur með lungnakrabbamein.

„Daginn sem ég lenti í árekstri, þá hrundi Leo líka. Hann hafði nýlega verið greindur með lungnakrabbamein (hann sigraðist á eitilfrumukrabbameini fyrir einu og hálfu ári síðan) en nú var hjartað að gefa sig. Hann var kvalinn og líkaminn gat ekki lengur fylgt sterku huganum,“ skrifar Vonn.

Kvöddum stóra strákinn minn

Leo drapst daginn eftir áreksturinn. Vonn segir að hundurinn hafi alltaf stutt hana þegar hún þurfti mest á því að halda.

„Þegar ég lá í sjúkrarúminu daginn eftir slysið kvöddum við stóra strákinn minn. Ég hafði misst svo mikið sem skipti mig máli á svo stuttum tíma. Ég trúi því ekki. Strákurinn minn hefur verið með mér síðan ég sleit krossband í annað sinn, þegar ég þurfti mest á honum að halda,“ skrifaði Vonn.

Hressti mig við þegar ég var niðurdregin

„Hann hélt mér félagskap í sófanum þegar ég horfði á Ólympíuleikana í Sotsjí. Hann hressti mig við þegar ég var niðurdregin. Hann lá hjá mér og kúrði, lét mér alltaf finnast ég vera örugg og elskuð. Við höfum gengið í gegnum svo mikið saman á þrettán árum,“ skrifar Vonn.

Hún er komin til Bandaríkjanna eftir sjúkraflug frá Ítalíu og fór þar í sína fimmtu aðgerð á fætinum.

Verður alltaf með mér

„Það mun taka mig smá tíma að vinna úr þessu tilfinningalega en ég veit að hann verður alltaf með mér. Ég veit að hann er þarna uppi með Lucy og Bear og mömmu minni og ömmu og afa og svo mörgum sem ég hef misst á síðustu árum. Og ég finn huggun í því að vita að hann er ekki lengur kvalinn,“ skrifar Vonn.