Sandra María mátti sætta sig við tap gegn sínu gamla liði

Bayer Leverkusen komst yfir strax á sautjándu mínútu leiksins þegar að hin þýska Vanessa Fudalla kom boltanum í netið. 

Leikar stóðu 1-0, Bayer Leverkusen í vil, allt þar til á 37.mínútu þegar að Sofie Zdebel tvöfaldaði forystu heimakvenna. 2-0.

Köln tókst að hleypa spennu í leikinn undir lok venjulegs leiktíma þegar að varamaðurinn Pauline Bremer minnkaði muninn fyrir gestina í stöðuna 2-1 en nær komst Köln ekki. 

Sandra María spilaði allan leikinn í liði Kölnar í kvöld, hún hefur skorað níu mörk til þessa í þýsku deildinni og er á meðal fimm markahæstu leikmanna deildarinnar og skrifaði á dögunum undir nýjan samning við félag sitt.

Köln vermir áttunda sæti deildarinnar og er með 25 stig, Sigur kvöldsins lyftir Bayer Leverkusen upp í þriðja sæti deildarinnar, þar situr liðið með 31 stig.