Sport

„Fyrsti leikurinn í vetur þar sem mér leið eins og ég þyrfti ekki að skipta mér neitt af liðinu“

Sesselja Ósk Gunnarsdóttir skrifar
Lárus Jónsson, þjálfari Þór Þorlákshafnar, þurfti ekki að hafa miklar áhyggjur af liðinu í kvöld.
Lárus Jónsson, þjálfari Þór Þorlákshafnar, þurfti ekki að hafa miklar áhyggjur af liðinu í kvöld. Hulda Margrét

Þór Þorlákshöfn sigraði ÍR 75-79 í 17. umferð Bónus deild karla í kvöld. Sigurinn var gríðarlega mikilvægur og gefur liðinu möguleika á að berjast um sæti í úrslitakeppninni.

„Frammistaðan hjá liðinu fannst mér vera góð. Við vorum í bílstjórasætinu frá fyrstu mínútu. Við spiluðum mjög góða vörn,  sóknarleikurinn var fínn og við höfðum góða stjórn á leiknum,“ sagði Lárus Jónsson, þjálfari Þórs Þórlákshafnar, eftir sigur liðsins í kvöld.

„Ef ég á að segja alveg eins og er þá er þetta fyrsti leikurinn í vetur þar sem mér leið eins og ég þyrfti ekki að skipta mér neitt af liðinu og gat leyft þeim að spila.“

Þór Þorlákshöfn skipti um kana í vikunni og spilaði Dachon Burke sinn fyrsta leik fyrir liðið í kvöld. Hann skilaði 23 stigum fyrir liðið, 7 fráköstum og 5 stoðsendingum. Hann var einnig með sjö stolna bolta og 21 í framlag.

„Hann stóð sig rosalega vel, bæði í að stýra liðinu og svo spilar hann hörku vel. Hann gefur okkur möguleikann á að skora nær körfunni og hann stelur boltum sem gefur okkur auðveld stig. Þannig stig vinna svona leðjuslagi eins og leikurinn var í dag.“




Fleiri fréttir

Sjá meira


×