Sjáðu bombu Szoboszlai og allt dramað í lokin

Öll helstu atvik úr leiknum má sjá í spilaranum hér að neðan. Liverpool komst yfir með draumamarki Dominik Szoboszlai úr aukaspyrnu en City endaði á að vinna leikinn 2-1.

Mesta umræðan eftir leik hefur þó verið um markið sem Rayan Cherki skoraði seint í uppbótartíma. Það var á endanum dæmt ógilt, eftir VAR-skoðun, og Szoboszlai fékk að líta rauða spjaldið í staðinn.

Ungverjinn breyttist úr hetju í skúrk því eftir að hafa komið Liverpool yfir sat hann eftir í vörninni og gerði Bernardo Silva réttstæðan, þegar Silva jafnaði eftir skallasendingu Erling Haaland.

Haaland kom svo City í 2-1 úr vítaspyrnu á þriðju mínútu uppbótartíma en þá var enn tími fyrir mikið havarí sem endaði með rauða spjaldinu á Szoboszlai.

Sigurinn heldur spennu í baráttunni um enska meistaratitilinn því City er nú sex stigum á eftir Arsenal, með 50 stig, Liverpool er í 6. sæti með 39 stig og nú fjórum stigum frá sennilegu Meistaradeildarsæti.