Aston Villa tapaði gegn tíu mönnum Brentford

Aston Villa var að tapa öðrum heimaleiknum í röð en Brentford batt enda á tveggja leikja taphrinu.

Kevin Schade fékk að líta rautt spjald á 42. mínútu fyrir að sparka í Matty Cash eftir að hafa brotið á honum.

Þrátt fyrir að missa mann af velli var Brentford ekkert minna hættulegt í skyndisóknum og eftir eina slíka skoruðu þeir eina mark leiksins, í uppbótartíma fyrri hálfleiks. Dango Ouattara var þar á ferð með góða afgreiðslu framhjá Emiliano Martínez.

Bæði lið fengu færi í seinni hálfleiknum til að skora en góðar vörslur og VAR dómarar stóðu í vegi fyrir mörkum. Tammy Abraham kom boltanum í netið fyrir Aston Villa en markið fékk ekki að standa og lokatölur urðu 0-1 fyrir Brentford.

Í leik Nottingham Forest og Crystal Palace skoraði Morgan Gibbs-White opnunarmarkið eftir aðeins fimm mínútur en í uppbótartíma fyrri hálfleiks fékk Crystal Palace vítaspyrnu.

Neco Williams varði bolta sem var á leiðinni í netið og fékk rautt spjald. Ismaila Sarr steig á vítapunktinn og skoraði jöfnunarmarkið.

Lokatölur 1-1 en liðin sitja í 14. sæti og 17. sæti. Forest er þremur stigum á eftir Palace.