Gæti farið frá Liverpool til Tottenham

Hinn áreiðanlegi David Ornstein hjá The Athletic greindi frá þessu í dag og virðast viðræðurnar á réttri leið í átt að samkomulagi. Núgildandi samningur Robertson við Liverpool rennur út í sumar.

Tottenham er á höttunum eftir liðsstyrk og þessi tíðindi af Robertson koma í kjölfar þess að Ben Davies ökklabrotnaði sem veikir Tottenham í vinstri bakvarðarstöðunni.

Robertson hefur verið hjá Liverpool í næstum því níu ár og átt mikilli velgengni að fagna. Hann er hins vegar ekki lengur fastamaður í liðinu, ekki síst eftir komu Milos Kerkez frá Bournemouth síðasta sumar.