Extra-leikarnir: „Fannst þessi ein­kunna­gjöf lykta af smá Kópa­vogs­með­virkni“

„Ég er að fara að vinna þetta,“ sagði Andri sigurviss fyrir keppni á jafnvægisslánni. Tommi tók undir með Nablanum og sagði hann mun sigurstranglegri.

„Hann verður augljós sigurvegari hérna í kvöld. Það eru margir fimleikamennirnir sem eru 1,59 og 61 kg eins og Nablinn en færri 1,95,“ sagði Tómas og Stefán Árni Pálsson benti svo á að Andri og fremsta fimleikakona sögunnar, Simone Biles, væru svipað stór.

Fimleikakonan Sif Pálsdóttir var fengin til að dæma keppnina og kenna Andra og Tomma tökin.

Andri kvaðst vera nokkuð sáttur með hvernig til tókst. „Ef ég ætti að setja út á eitthvað er að ég vissi ekki að ég væri að fara alveg strax í tempóið á hoppinu. En annars geng ég mjög stoltur frá borði og ánægður með mitt verk. Ég datt ekki og það var markmiðið.“

Sif kvað svo upp úrskurð sinn sem var ekki óumdeildur eins og sjá má í spilaranum hér fyrir ofan.