Kynnir sér mögu­leika varðandi Íran og leggur toll á vinaríki klerka­stjórnarinnar

Þetta herma heimildir Breska ríkisútvarpsins en forsetinn hefur ítrekað hótað því að skipta sér af málum þar í landi nú þegar mikil mótmælaalda gengur yfir landið.

Mannréttindasamtök segja um sexhundruð mótmælendur liggja í valnum og fjölmarga lögreglumenn einnig. Til greina þykir koma að skjóta langdrægum eldflaugum á valin skotmörk í landinu en einhverskonar tölvuárás gæti einnig orðið fyrir valinu.

Trump kynnti síðan í gærkvöldi þá ákvörðun sína að leggja 25 prósenta aukatoll á öll þau ríki sem eiga í viðskiptasambandi við Íran. Utanríkisráðherra Írans segist opinn fyrir viðræðum við bandarísk stjórnvöld en fullyrðir einnig að ríkið sé tilbúið til að fara í stríð, komi til þess.

Þjóðaröryggisráð Bandaríkjanna kemur saman síðar í dag til að funda um málið en þó er óljóst hvort forsetinn sjálfur verði viðstaddur.