Rúnar Ingi: „Kæfðu okkar stemningu og völtuðu yfir okkur“

„Þetta var slakasti leikur úr meistaraflokki Njarðvíkur á meðan ég hef verið þjálfari“, sagði Rúnar Ingi Erlingsson, þjálfari Njarðvíkur, eftir tap liðsins í kvöld.

Njarðvík tapaði naumlega fyrir Grindavík í síðustu umferð og taldi Rúnar það tap mögulega haft eitthver áhrif á liðið í kvöld.

„Við vorum fannst mér vel undirbúnir og vorum vel gíraðir í gær á æfingu og í dag í klefanum. Þegar leikurinn byrjaði og harkan byrjaði á gólfinu fannst mér við sjá að leikurinn frá því á sunnudaginn sat vel í mínum mönnum.“

„Við erum að spila á fáum mönnum og okkar helstu hestar hafa þurft að hlaupa. Mjög fljótlega í öðrum leikhluta fóru lappir að þyngjast og skotin öll, þó þau væru galopin voru of stutt. Það voru þyngri skref til baka og með því náði ÍR að kæfa okkar stemningu og völtuðu bara yfir okkur.“

0 stig frá varamannabekk Njarðvíkur

Varamenn Njarðvíkur skoruðu ekkert stig af bekknum í kvöld sem er áhyggjuefni fyrir lið eins og Njarðvík sem er í botnbaráttu Bónus deildarinnar.

„Mögulega þarf ég að finna betri leiðir til þess að rótera. Við þurfum að hafa meira sjálfstraust alltaf, ekki bara þegar byrjunarliðinu gengur vel. Ég þarf innspýtingu af bekknum líka og mér fannst smá flatleiki og hræðsla. Við tókum ekki opin skot þegar við vorum að fá opin skot til þess að koma með neista af bekknum. Þeir þurfa að koma inn með auka orku þó þeir hafi ekki sömu reynslu eða sömu sentimetra eða þyngd. Þeir þurfa að finna leiðir til þess að hafa áhrif á leikinn og gefa okkur eitthvað jákvætt en við fengum fátt jákvætt í dag.“

„Við skorum 59 stig og áttum mjög erfitt með að koma boltanum í netið og þá vinnur þú ekki körfuboltaleiki“, sagði Rúnar að lokum.