24 fengu at­kvæði í kjöri Í­þrótta­manns ársins í ár

Lyftingakonan Eygló Fanndal Sturludóttir var kjörin Íþróttamaður ársins með nokkrum yfirburðum því hún fékk 74 stigum meira en handboltamaðurinn Gísli Þorgeir Kristjánsson sem varð annar. Þau voru langefst í kjörinu en körfuboltamaðurinn Tryggvi Snær Hlinason endaði í þriðja sætinu, 247 stigum á eftir Gísla.

Kylfingurinn Gunnlaugur Árni Sveinsson var næstur því að komast á topp tíu listann en hann vantar bara fjögur stig. Dansparið Hanna Rún Óladóttir Bazev og Nikita Bazev var níu stigum frá því að vera tilnefnd í ár.

Knattspyrnufólkið Cecilía Rán Rúnarsdóttir og Albert Guðmundsson komu síðan næst en handboltafólkið Thea Imani Sturludóttir og Viktor Gísli Hallgrímsson, langhlauparinn Baldvin Þór Magnússon, hestamaðurinn Konráð Valur Sveinsson og körfuboltamaðurinn Elvar Már Friðriksson voru öll inn á topp tuttugu.