Ey­gló Fanndal er Í­þrótta­maður ársins 2025

Eygló hlaut alls 532 atkvæði af 600 mögulegum en þrjátíu íþróttafréttamenn kusu í ár. Í öðru sæti varð handboltamaðurinn Gísli Þorgeir Kristjánsson með 458 stig og þriðji varð körfuboltamaðurinn Tryggvi Snær Hlinason með 211 stig.

74 stigum meira en næsti

Eygló fékk því 74 stigum meira en sá sem var í öðru sæti og er því um afar sannfærandi kosningu að ræða. Eygló hækkaði sig um tvö sæti frá því í kjörinu í fyrra þegar hún var í fyrsta sinn á topp tíu listanum og endaði í þriðja sæti.

Eygló er fyrst allra úr heimi ólympískra lyftinga til að hljóta þessa útnefningu og jafnframt aðeins níunda konan sem er kjörin Íþróttamaður ársins frá upphafi.

Sjötta konan á síðustu ellefu árum 

Eygló er aftur á móti sjötta konan til að vera kosin Íþróttamaður ársins á síðustu ellefu árum en konur hafa nú haldið titlinum tvö ár í röð því knattspyrnukonan Glódís Perla Viggósdóttir var kjörin í fyrra.

Eygló varð á árinu Evrópumeistari í -71 kílóa flokki á Evrópumótinu í Moldóvu í apríl en hún varð um leið fyrsti Íslendingurinn til að verða Evrópumeistari í ólympískum lyftingum fullorðinna.

Eygló lyfti samtals 244 kílóum á mótinu sem var hærri samanlögð þyngd en Evrópumeistararnir í -76 kg og í -81 kg flokkum lyftu. Hún náði líka öðrum besta árangrinum þegar kemur að heildarstigum á Evrópumótinu óháð þyngdarflokki.

Setti Íslandsmet í öllum þremur

Eygló varð einnig Evrópumeistari í jafnhendingu á mótinu þar sem hún lyfti 135 kílóum og fékk silfurverðlaun í snörun með lyftu upp 109 kíló, sem var einu kílói minna en hjá gullverðlaunahafanum. Eygló setti Íslandsmet í öllum þremur greinum, það er í jafnhendingu, snörun og samanlögðu.

Eygló glímdi svo við meiðsli síðari hluta árs sem komu í veg fyrir þátttöku hennar á heimsmeistaramótinu í október, þar sem hún hefði verið líkleg til afreka.

Fyrr á árinu varð hún Íslandsmeistari í sínum flokki fimmta árið í röð og svo tryggði hún sér einnig gullverðlaun á Smáþjóðamótinu.