Kimmel á­varpar bresku þjóðina: Frá­bært ár fyrir fas­isma

Stöðin fær á hverju ári óvenjulega einstaklinga til að halda nýársávarp og tala til bresku þjóðarinnar. Meðal þeirra sem hafa haldið ávarpið er uppljóstrarinn Edward Snowden og fyrrverandi forseti Írans Mahmoud Ahmadinejad. Breska blaðið Guardian segir að spjallþáttastjórnandinn muni gagnrýna bandarísk yfirvöld mjög í ávarpi sínu.

„Frá sjónarhóli fasisma, þá hefur þetta verið virkilega frábært ár,“ mun sjónvarpsmaðurinn meðal annars segja í ávarpi sínu. Spjallþáttur hans til margra ára var skyndilega tekinn af dagskrá ABC sjónvarpsstöðvarinnar í september eftir að hann sakaði hreyfingu Trump-liða um að nýta sér morðið á Charlie Kirk í pólitískum tilgangi.

Trump hrósaði stjórnendum ABC sjónvarpsstöðvarinnar í hástert fyrir ákvörðunina en eigandi stöðvarinnar Disney var undir mikilli pressu frá Hvíta húsinu vegna málsins. Rifjað er upp í umfjöllun Guardian að ákvörðunin hafi vakið mikla neikvæða athygli og verið harðlega gagnrýnd víða, sem svo varð til þess að þáttur Kimmel var tekinn aftur til sýninga nokkrum dögum síðar.

Segir miðillinn að sjónvarpsmaðurinn muni sérstaklega þakka þeim fyrir sem hafi komið honum til varnar. Haft er eftir Channel 4 að forsvarsmönnum sjónvarpsstöðvarinnar hafi þótt einkar viðeigandi að Kimmel myndi ávarpa bresku þjóðina á þessum tímamótum, í ljósi endurkomu Donalds Trump í Hvíta húsið og baráttuna fyrir málfrelsi.