Jasmín kom til að vinna titla og er farin frá Val

Valur greindi frá brotthvarfi Jasmínar á Facebook í dag. Þar er henni þakkað fyrir árin tvö með liðinu og ekki síst hennar framlag í bikarmeistaratitlinum í fyrra.

Jasmín er ósátt við þær breytingar sem urðu eftir leiktíðina í fyrra, þegar Pétur Pétursson og Adda Baldursdóttir hættu sem þjálfarar og öflugir, reynslumiklir leikmenn voru látnir fara. Valur var langt frá titilbaráttu á síðustu leiktíð og nú hafa fleiri leikmenn, landsliðskonur með mikla reynslu, kvatt félagið. Það ákvað Jasmín einnig að gera og ástæðan er skýr.

Kom ekki fyrir uppbyggingarstefnu

„Breytt stefna. Allt í góðu með það. Það er einhver uppbyggingarstefna í gangi sem er í fínu lagi en ég kom bara ekki fyrir það.

Ég kom til að vinna titla og það var aðalmarkmiðið þegar ég kom til Péturs og Öddu [þáverandi þjálfara Vals], og hópurinn var náttúrulega í samræmi við það. En það hafa orðið gríðarlega miklar breytingar á hópnum,“ sagði Jasmín við Vísi í dag.

Ánægð með fyrra árið en síðasta sumar tók á

Ný stjórn knattspyrnudeildar Vals tók við eftir leiktíðina í fyrra og virðast hugmyndir hennar um kvennaliðið afar ólíkar þeim sem fyrri stjórn hafði. Ungir og efnilegir leikmenn hafa verið sóttir en liðið að sama skapi ekki eins vel í stakk búið til að sækja stóru titlana.

„Þegar ég kom var Valur langbesta liðið á landinu og að vinna alla titla. Ég kom í þannig lið og átti eitt tímabil þar sem við vorum bara óheppnar að vinna ekki Íslandsmeistaratitilinn, en unnum bikarinn. Ég er mjög ánægð með það tímabil og þakklát Pétri og Öddu að hafa fengið mig, en svo verður einhver vendipunktur og allt snýst við,“ sagði Jasmín sem naut þess ekki að vera í miðjumoði með Val í sumar:

„Þetta var eiginlega mikil vonbrigði og erfitt tímabil. Þetta tók gríðarlega á hópinn. Við vorum alveg með gott lið en náðum ekki að spila nógu vel saman og ég held að atburðir vetrarins, þegar margir leikmenn fóru, hafi setið í okkur.“

Mamma sem vill að næsta skref verði þess virði

Aðspurð hvort næsta skref væri þegar ákveðið sagði Jasmín svo ekki vera:

„Mér er búið að líða mjög vel með að vera í fríi og ég ætla bara að sjá til með framhaldið. Næsta skref verður að vera þess virði. Í sumar fannst mér þetta ekki þess virði, að vera með barn og eyða öllum þessum tíma. Þetta þarf að vera mjög spennandi og mig langar að prófa eitthvað nýtt, annað hvort hér eða úti.“