Segir Úkraínumönnum að hörfa eða deyja

Hann sagði að ef þeir hörfuðu ekki yrðu úkraínskir hermenn á svæðinu felldir og að úkraínski herinn myndi tapa öllum sínum hernaðarmætti.

Þetta var meðal þess sem Pútín sagði á blaðamannafundi í Rússlandi í dag.

Forsetinn var að tala um svæði í austurhluta Úkraínu, nánar tiltekið í Dónetskhéraði, sem Rússar hafa reynt að hernema í nokkur ár. Hæg framsókn þeirra um víggirt svæðið hefur kostað Rússa verulega í mannslífum og hergögnum.

Í nýlegri grein Washington Post kom fram að á þessu ári hafi Rússar lagt undir sig minna en eitt prósent af Úkraínu. Þetta svæði hafi verið hernumið á kostnað þess að fleiri en tvö hundruð þúsund hermenn hafi fallið eða særst í átökunum.

Í nýlegri friðaráætlun sem Bandaríkjamenn kynntu fyrir ráðamönnum í Kænugarði á dögunum var lagt til að Úkraínumenn hörfuðu frá þessu svæði og þar með öllu Donbassvæðinu svokallaða.

Því hafa Úkraínumenn alfarið hafnað. Pútín sagði aftur á móti að af þessu yrði og að Rússar taki stjórn á Donbassvæðinu öllu og öðrum svæðum í landinu yrði alþjóðasamfélagið að viðurkenna eignarrétt Rússa á úkraínsku landsvæði.

Pútín sagði á fundinum að ómögulegt væri að semja við núverandi stjórnvöld Úkraínu. Þau væru ólögmæt, sem þau eru ekki.

Pútín fór um víðan völl á blaðamannafundinum. Meðal annars sagði hann Rússa hafa engan áhuga á að ráðast á ríki Evrópu. Það hefði aldrei staðið til og ríkisstjórn hans væri tilbúin til að staðfesta það formlega.

Hann skammaðist einnig yfir ráðamönnum í Evrópu, eins og Rússar hafa ítrekað gert að undanförnu, og sakaði þá um að standa í vegi friðar.

Annar liður í áróðri Rússa er að saka Evrópu um að bera ábyrgð á þjáningum Úkraínumanna með að standa við bak þeirra og framlengja þannig stríðið.

Pútín sagði „sumir“ og vísaði þar til Evrópumanna, væru tilbúnir til að halda stríðinu gangandi þar til síðasti Úkraínumaðurinn fellur.

„Rússar eru tilbúnir til þess.“

Kvartaði yfir tilraunum til eignaupptöku

Pútín ræddi sérstaklega um mögulega eignaupptöku á frystum sjóðum Rússa í Evrópu, aðallega í Belgíu, og sagði að slíkt yrði ekkert annað en þjófnaður. Allir væru sammála um það.

Hann sagði að það myndi grafa undan trausti til evrusvæðisins og að Rússar myndu bregðast harðlega við slíkum aðgerðum.

Embættismenn Evrópusambandsins hafa um nokkurra mánaða skeið reynt að finna leiðir til að nota um þær fúlgur fjár sem frystar hafa verið í sjóðum Rússa í Evrópu. Mest er um að ræða peninga í bönkum í Belgíu, en í heildina eru þetta um 140 milljarðar evra, eða um 20,6 billjónir króna (20.600.000.000.000).

Vextirnir af þessum peningum hafa um nokkuð skeið verið notaðir til að fjármagna rekstur úkraínska ríkisins.

Nú vilja bakhjarlar Úkraínu nota peningana til að fjármagna uppbyggingu á hergagnaiðnaði í Úkraínu og til að fjármagna kaup á hergögnum frá Bandaríkjunum á næstu árum. Úkraínumenn vilja einnig nota þá til að fjármagna ríkisreksturinn þar í landi.

Kvartaði yfir hleru á samtali erindreka og ráðgjafa

Pútín var einnig spurður út í fréttir um að Steve Witkoff, sérstakur erindreki Donalds Trump, hefði átt í samskiptum við náinn ráðgjafa Pútíns. Upptökum af samtali þeirra var lekið til fjölmiðla á dögunum og þar kom fram að Witkoff hefði ráðlagt ráðgjafa Pútíns hvernig forsetinn rússneski gæti haft mest áhrif á Trump.

Þá lofaði Witkoff Pútín í samtali við ráðgjafann og sagðist sannfærður um að Pútín vildi frið.

Witkoff mun á næstunni fara til Moskvu til viðræðna við ráðamenn þar og Pútín sagði á fundinum í dag að það hefði verið skrítið ef Witkoff hefði talað illa um Rússland í samtökum við Rússa. Slíkt myndi ekki hafa jákvæð áhrif á viðræður ríkjanna.

Þá kvartaði Pútín yfir því að samtalið hefði verið hlerað og tekið upp. Það væri glæpsamlegt að gera slíkt í Rússlandi. Hann sagði hlerunina óásættanlega tilraun til að hafa áhrif á friðarviðræðurnar og sagði hana jafnast á við blandaðan hernað eða fjölþátta ógnir, sem Rússar hafa verið sakaðir um víða í Evrópu.

Hann gaf þó einnig til kynna að um einhvers konar fölsun gæti verið að ræða, þó ráðgjafi hans hafi áður staðfest að samtalið hafi átt sér stað.