Mál Alberts truflar lands­liðið ekki

Aðalmeðferð í máli Alberts, sem sætir ákæru fyrir nauðgun, hófst í Landsrétti í morgun og reiknað er með því að henni ljúki á morgun og dóms að vænta innan fjögurra vikna og eins dags.  

Albert var sýknaður í október á síðasta ári en Ríkissaksóknari ákvað að áfrýja dóminum þremur vikum eftir að hann var kveðinn upp. 

Í hádeginu opinberaði Arnar Gunnlaugsson, landsliðsþjálfari Íslands, landsliðshóp fyrir komandi leiki í undankeppni HM 2026 en málið sem nú er fyrir Landsrétti kemur ekki í veg fyrir að hægt sé að velja hann í íslenska landsliðið.

Aðspurður hvort að mál Alberts sé að vefjast fyrir landsliðinu nú þegar að stutt er í næsta verkefni segir Arnar svo ekki vera. 

„Nei, alls ekki,“ svaraði Arnar í samtali við íþróttadeild eftir blaðamannafund í dag. „Þetta mál er bara í ákveðnum farvegi og við bíðum bara eftir niðurstöðu í því. Þetta er ekkert að trufla okkar vinnu hérna innanbúðar,“ svaraði Arnar en Ísland mætir Aserbaíjan ytra þann 13.nóvember næstkomandi og svo Úkraínu í Póllandi nokkrum dögum síðar. 

Leikirnir tveir munu skera úr um það hvort HM-draumur Íslands lifi fram yfir riðlakeppnina en Ísland háir nú harða baráttu við Úkraínu um annað sæti riðilsins sem veitir þátttökurétt í umspili í mars á næsta ári.