Meistaradeildin skiptir um bjór og Heineken snýr sér að padel

Í tilkynningu frá Heineken segir að tíðindin séu ekki óvænt. Fyrirtækið ætli áfram að vera stoltur styrktaraðili Formúlu 1 og sé nýbúið að gera samning við Premier Padel, mótaröð í padel sem sé íþróttagrein á mikilli uppleið.

Þá ætlar fyrirtækið að nýta vel þau tvö ár sem eftir eru af samstarfinu við Meistaradeildina í fótbolta.

Bandarískir miðlar á borð við AP segja allt útlit fyrir að Budweiser taki við af Heineken sem opinberi Meistaradeildarbjórinn.

Samkvæmt AP er sex ára samningur í bígerð sem mun ná til Meistaradeildarinnar, Evrópudeildarinnar og Sambandsdeildarinnar. Mun hann tryggja UEFA 200 milljónir evra á ári, eða jafnvirði tæplega þrjátíu milljarða króna.