Um­fangs­miklar upp­sagnir hjá Amazon

Samkvæmt frétt Wall Street Journal er búist við því að uppsagnirnar muni ná til svo gott sem allra deilda þessa risavaxna fyrirtækis. Svipaðar aðgerðir eru sagðar yfirstandandi eða í undirbúningi víða um Bandaríkin þessa dagana, þar sem forsvarsmenn fyrirtækja leita leiða til að draga úr kostnaði.

Hækkandi verðlag, skortur á starfsfólki og sífellt breytilegar tollaaðstæður eru sagðar meðal ástæðna þess að forsvarsmenn fyrirtækja reyna að herða beltisólarnar, með vonum um að það komi ekki niður á vexti.

Innan veggja Amazon er litið á uppsagnir sem framhald uppsagna 2022, þegar um 27 þúsund starfsmönnum var sagt upp. Um sé að ræða leiðréttingu á gífurlegri stækkun sem varð á Covid-tímabilinu, þegar mikil aukning varð á netkaupum og Amazon réð fólk í massavís til að standast aukna eftirspurn.

Róbótar í stað fólks

New York Times sagði frá því á dögunum að frá 2018 til dagsins í dag hefði fjöldi starfsmanna Amazon í Bandaríkjunum þrefaldast og rúmlega það. Þar vinni nú um 1,2 milljónir manna.

Leiðtogar Amazon sjá samt fyrir sér skipta út stórum hluta starfsmanna þeirra fyrir róbóta á komandi árum. Að fyrir árið 2033 gætu róbótar leyst af rúmlega sex hundruð þúsund manns, sem annaðhvort vinna nú þegar fyrir fyrirtækið eða óþarfi verður að ráða.

Markmiðið er að gera um 75 prósent af starfsemi Amazon sjálfvirka.

Í yfirlýsingu vegna fréttar NYT sagði talsmaður Amazon að gögnin sem fréttin byggði á sýndu ekki heildarmyndina. Vísaði talsmaðurinn meðal annars til þess að til stæði að ráða um 250 þúsund manns til Amazon vegna anna yfir hátíðarnar en ekki var sagt hve mörg þessara starfa ættu að vera tímabundin.

Þetta var nokkrum dögum áður en áðurnefndar uppsagnir voru tilkynntar.