Rúss­neskur kaf­bátur í fylgd sænska hersins

Herþota og skip úr flota sænska hersins komu til móts við kafbátinn við Kattegat og fylgja honum nú þétt eftir. Um sé að ræða reglubundna aðgerð sem sé framkvæmd í nánu samstarfi við önnur bandalagsríki. Fram kemur í tilkynningunni að sænski herinn hafi góða yfirsýn og mynd af aðstæðum í sínu nærumhverfi.

Í samtali við sænska blaðið Expressen segir Jonas Beltrame-Linné, fjölmiðlafulltrúi hjá sænska hernum, að kafbáturinn sé vel sýnilegur frá yfirborði og allt gangi samkvæmt áætlun. Hann tekur einnig fram að kafbáturinn sé á alþjóðlegu hafsvæði og hafi ekki siglt inn á sænskt yfirráðasvæði.

Ekki liggur ljóst fyrir hvort danski herinn hafi aðkomu að aðgerðinni að því er fram kemur í umfjöllun TV2.

Mark Rutte, framkvæmdastjóri Atlantshafsbandalagsins, hæddist að rússneska flotanum á blaðamannafundi í gær þegar hann sagði að rússneski kafbáturinn Novorossiysk, sem sást á ferðinni meðfram ströndum Frakklands áleiðis að Norðursjó, væri „haltrandi“ á leiðinni heim. Umræddur kafbátur hefur verið bilaður á brölti í nokkrun tíma. Ekki hefur verið staðfest um hvort um sama kafbát er að ræða en sænska ríkisútvarpið SVT fullyrðir í sinni umfjöllun um málið að þar sé á ferðinni sami kafbáturinn.

Fréttin hefur verið uppfærð.