Ís­lands­banki og Skagi í form­legar samrunaviðræður

Þetta kemur fram í tilkynningu til Kauphallarinnar.

Skagi er móðurfélag tryggingafélagsins VÍS, sem varð til með sameiningu VÍS og Fossa.

Þar segir að lagt sé upp með að starfsemi Skaga verði sameinuð Íslandsbanka og að hluthafar Skaga eignist samtals 323.859.440 nýja hluti í Íslandsbanka í skiptum fyrir hlutabréf sín í Skaga, eða sem svarar til um 15% útgefins hlutafjár í sameinuðu félagi.

Bankastjóri sameinaðs félags yrði Jón Guðni Ómarsson, bankastjóri Íslandsbanka.

„Samrunaaðilar sjá fjölmörg tækifæri í sameiningu félaganna. Báðir aðilar hafa lýst vilja sínum til ytri vaxtar og telja að ýmis tækifæri felist í samþættingu á fjármálamarkaði, sem geti skapað veruleg verðmæti fyrir sameinað félag, viðskiptavini þess og aðra hagsmunaaðila. Til staðar eru mörg tækifæri í aukinni samþættingu bankaþjónustu til einstaklinga og fyrirtækja við tryggingastarfsemi, með það að leiðarljósi að auka gæði og hagkvæmni í þjónustu. Þá búa bæði félög yfir öflugri eignastýringu, sem myndar grunn að áframhaldandi sókn á þeim markaði. Til viðbótar telur bankinn að með samruna við Skaga styrkist enn frekar leiðandi staða Íslandsbanka í fjárfestingarbankastarfsemi,“ segir í tilkynningunni.

Þá segir að um sé að ræða hagfelld viðskipti fyrir hluthafa Íslandsbanka og að þau séu í samræmi við stefnu bankans um arðbæran vöxt. Sameinað félag muni áfram búa yfir verulegu umfram eigin fé, sem skapi frekari tækifri til vaxtar.

Viðræður munu fara fram á næstu vikum og aðilar upplýsa um framvindu þeirra í samræmi við lögbundna upplýsingaskyldu.

Nokkrar hreyfingar hafa verið á fjármálamarkaði síðustu misserin. Þannig keypti Landsbankinn tryggingafélagið TM sem Fjármálaeftirlit Seðlabanka Íslands samþykkti fyrir um ári. Þá eiga Arion banki og Kvika nú í samrunaviðræðum, en stjórnir bæði Íslandsbanka og Arion óskuðu á sínum tíma eftir sameiningarviðræðum við Kviku, en stjórn Kviku ákvað að lokum að hefja viðræður við Arion banka og standa þær nú yfir.