Real Madrid á­fram á sigurbraut

Real Madrid vann sinn þriðja leik í röð í spænsku deildinni en liðið hefur ekki enn stigið feilspor undir stjórn Xabi Alonso.

Liðið tók á móti Mallorca í kvöld og eftir að hafa lent 0-1 undir komu tvö mörk á tveimur mínútum frá Vini Jr, sem snéri aftur í byrjunarliðið, og Arda Guler á 37. og 38. mínútu. Það reyndust einu tvö mörk liðsins í kvöld sem fengu að standa. Lokatölur 2-1 í Madríd í kvöld.

Fyrst var mark dæmt af Mbappe strax í upphafi leiks vegna rangstöðu og í seinni hálfleik var mark dæmt af Guler þar sem boltinn virtist mögulega hafa viðkomu í hendinni á honum þegar hann náði frákasti eftir skot og skoraði svo.

Þessir dómar komu þó ekki að sök og Real Madrid heldur áfram fulla ferð í spænsku deildinni undir stjórn Xabi Alonso.