Á­kærð fyrir að bana föður og til­raun til að bana móður

Karl Ingi Vilbergsson, saksóknari hjá héraðssaksóknara, staðfestir efni ákærunnar í samtali við Vísi en hún fæst ekki afhent að svo stöddu. Konan, hin 28 ára gamla Margrét Halla Hansdóttir Löf, er sökuð um að hafa orðið föður sínum að bana á heimili fjölskyldunnar föstudaginn 11. apríl.

Samkvæmt heimildum fréttastofu var eiginkona hans flutt illa slösuð á sjúkrahús um svipað leyti eftir að hafa orðið fyrir líkamsárás dótturinnar. Fyrir þá árás er dóttirin ákærð fyrir tilraun til manndráps.

Auk þess er dóttirin ákærð fyrir stórfelld brot í nánu sambandi gagnvart bæði föður sínum og móður. Fólk sem þekkir til fjölskyldunnar hefur lýst því í samtali við fréttastofu að dóttirin hafi beitt foreldra sínu andlegu og líkamlegu ofbeldi árum saman sem foreldrarnir hafi látið yfir sig ganga.

Karl Ingi segir að varakrafa héraðssaksóknara hljóði upp á stórfellda líkamsárás bæði gagnvart móðurinni og föðurnum, Hans Roland Löf sem var á áttugasta aldursári þegar hann lést.

Samkvæmt heimildum fréttastofu var það móðirin sem hringdi í Neyðarlínuna að morgni föstudagsins 11. apríl þegar eiginmaður hennar hneig niður í framhaldi af ofbeldi dótturinnar. Hjónin bjuggu í einbýlishúsi við Súlunes á Arnarnesinu í Garðabæ. Töluverðir áverkar voru á móðurinni samkvæmt heimildum fréttastofu og lá hún inni á Landspítalanum í nokkra daga.

Sonur hins látna gerir kröfu um miskabætur úr hendi Margrétar hálfsystur sinnar upp á sex milljónir króna. Eiginkona hins látna og móðir ákærðu gerir ekki kröfu um bætur vegna málsins. Dagsetning fyrir þingfestingu málsins sem verður til meðferðar við Héraðsdóm Reykjaness liggur ekki fyrir.