Banda­rískir trú­boðar herja á ein­angraða ætt­bálka með drónum og sólarknúnum afspilunartækjum

Þetta kemur fram í nýrri umfjöllun sem breski miðillinn Guardian og hinn brasilíski O Globo unnu en í Amasonfrumskóginum dvelja flestir ættbálkar sem eru án samskipta við umheiminn eða svokallaðir uncontacted peoples. Þessir ættbálkar hafa varðveitt sína hefðbundnu lifnaðarhætti og eru að mestu leyti algjörlega lausir við afskipti nútímasamfélags og stjórnvalda.

Viðkvæm ónæmiskerfi illa í stakk búinn fyrir fagnaðarerindið

Ættbálkar þessir eru miseinangraðir. Sumir þeirra eiga í einhverjum samskiptum og viðskiptum við brasilískt samfélag og sækja til dæmis heilbrigðisþjónustu eða nauðsynjavörur í þéttbýli. Aðrir hafa hins vegar litla sem enga þekkingu á umheiminum og forðast aðkomumenn eins og hægt er.

Víða um vatnasvið Amasonfljóts hafa einangraðir ættbálkar orðið fyrir barðinu á ósvífnum mönnum í gróðaleit en heimkynni þeirra eru eftirsótt undir skógarhögg, landbúnað og námuvinnslu. Undir frumbyggjamálastofnun brasilískra stjórnvalda starfar sérstök stofnun sem annast málefni einangraðra ættbálka og verndar hagsmuni þeirra. Þessara hagsmuna á meðal er varðveisla menningu þeirra, máls og trúar sem innlendir og bandarískir trúboðar herja á í sífellt auknum mæli.

Svo ekki sé minnst á hættuna sem að ættbálkunum steðjar komist þeir í návígi við trúboðana sem bera með sér sjúkdóma sem ónæmiskerfi meðlima ættbálkanna sem hafa verið einangraðir sumir hverjir í þúsundir ára eiga ekki roð í.

Sólarknúin afspilunartæki með heilagri ritningu

Djúpt í Javari-dal Amasonfrumskógarins býr Kórúbófólkið sem er enn þann dag í dag að mestu leyti einangraður þó ýmsir þeirra séu í takmörkuðum samskiptum við landnema í brasilísku byggðinni Tabatinga við ármót Amasonfljótsins og Javarifljótsins.

Skömmu fyrir upphaf heimsfaraldursins var fjallað um að hópur af bandarískum trúboðum hefði verið staðinn að því að skipuleggja trúboðsferð til einangraðra ættbálka Javari-dalsins. Þremur mönnum, þeim Thomas Andrew Tonkin, Josiah McIntyre og Wilson de Benjamin Kannenberg, var meinaður aðgangur að svæðinu með dómsúrskurði en þeir eru tengdir samtökum sem heita Missão Novas Tribos do Brasil eða Trúboð nýrra ættbálka Brasilíu á íslensku.

Nú hefur það komið á daginn að trúboðarnir eru snúnir aftur til Javari-dals með ný brögð uppi í erminni, tæki sem þeir földu. Samkvæmt umfjöllun Guardian fannst tækið fyrst í afskekktu þorpi Kórúbóa nýverið. Það er gult og svart og á stærð við litla talstöð. Á því er látlaust viðmót, hátalari og hnappar sem, ef ýtt er á þá, spila upplestra úr heilagri ritningu og ræður eftir bandarískan baptista. Eftir því sem miðillinn kemst að eru minnst sjö slík tæki í umferð en þau eru knúin sólarorku enda engir rafmagnsinnviðir í frumstæðum þorpum ættbálkanna.

„Sjáum hvað Páll segir er hann veltir fyrir sér eigin lífi í þriðja kafla Filippíbréfsins versi fjögur: „Ef einhver annar þykist geta treyst á ytri merki gæti ég það fremur.““ ómar úr tækinu á spænsku og portúgölsku.

Tækið er framleitt af bandarískum samtökum baptista sem heita In Touch Ministries og eru rekin úr Atlantaborg í Georgíuríki. Samtökin þvertaka fyrir það að hafa nokkra aðkomu að því að tækið komst í hendur Kórúbómanna, enda er þeim meinaður aðgangur að heimkynnum þeirra, en framkvæmdastjóri þeirra segir það ekki útilokað að „önnur samtök“ trúboða hafi smyglað því þangað inn.

Drónar meðal verkfæra trúboða

Kórúbóarnir eru gríðarlega eftirsóttir meðal bandarískra trúboðasamtaka enda áttu þeir ekki í samskiptum við umheiminn fyrr en árið 1996. Þeir eru því kjörið viðfangsefni þeirra sem vilja breiða út fagnaðarerindið enda ræðir þar um sálir sem hafa hingað til þessa haft enga vitneskju af Jesú Kristi.

Við vinnslu umfjöllunarinnar var einnig rætt við Cardovan da Silva Soeiro liðþjálfa. Hann starfar á stöð brasilískra stjórnvalda við heimkynni Kórúbóa og segir brasilísku lögregluna meðvitaða um ágang trúboða. Þeir hafi meðal annars orðið varir við umferð flygilda í og við stöðina.

„Við vitum ekki hvort þeir tilheyra trúboðum, fíkniefnasmyglurum, veiðimönnum eða námuverkamönnum sem fylgjast með stöðinni til að sjá hvort þeir komist hérna í gegn. Þegar mér barst skipun að ofan um að skjóta þá niður, mundaði ég riffilinn en dróninn komst undan á miklum hraða. Þeir virka mjög þróaðir,“ segir hann.