Sam­runinn muni taka langan tíma

Í sameiginlegri yfirlýsingu í dag segir að markmiðið með samrunanum sé að sameina krafta félaganna og búa til sterkt fjármálafyrirtæki sem býður heildstæða þjónustu fyrir viðskiptavini.

Samruninn verði einn sá umfangsmesti sem ráðist hefur verið í á íslenskum fjármálamarkaði og ger megi ráð fyrir að ferlið taki þónokkurn tíma. Reglulega verði greint frá stöðu mála og framvindu viðræðna eftir því sem við á og ástæða er til.

Óska eftir forviðræðum í ágúst

Fyrstu skrefin séu áreiðanleikakannanir og samrunaviðræður milli félaganna, og sú vinna sé þegar hafin. Stefnt sé að því að óska eftir forviðræðum við Samkeppniseftirlitið í ágúst, þar sem kynnt verði markmið með samrunanum og sá ávinningur sem muni hljótast af honum, bæði fyrir viðskiptavini og íslenskan fjármálamarkað. Vonast sé til að forviðræður, samningagerð og áreiðanleikakannanir klárist á næstu mánuðum. 

Að því gefnu að forviðræður við Samkeppniseftirlitið gangi vel, verði samruninn tilkynntur formlega til eftirlitsaðila og síðar lagður fyrir hluthafafundi beggja félaga.

Kvika verið virkur keppinautur

Ef af samruna Kviku og Arion verður muni það styrkja og efla bankaþjónustu við viðskiptavini sameinaðs félags, einstaklinga, fyrirtæki og fjárfesta. Við samrunann skapist tækifæri til áhættudreifingar og breiðari tekjumyndunar en hann leiði ekki síður til aukins hagræðis í starfsemi sameinaðs félags og þar með á íslenskum fjármálamarkaði.

Kvika hafi síðustu ár verið virkur keppinautur á mörkuðum, meðal annars með vörumerkið Auði, sem hafi haft mikil áhrif á innlánamarkað og nýlega farið inn á húsnæðislánamarkað með góðum árangri. Eftir sameiningu muni vörumerki félaganna halda áfram að gegna mikilvægu hlutverki fyrir viðskiptavini.